„Þetta er kannski alltaf svona á bak við eyrað“ : kynjajafnréttismenntun elstu barna í sex leikskólum

Í þessari ritgerð er gerð grein fyrir því hvernig staðið er að kynjajafnréttismenntun elstu barna í sex leikskólum og er markmið rannsóknarinnar að fá sýn á þá kynjajafnréttismenntun sem fer fram í daglegu starfi. Tvær meginspurningar voru hafðar að leiðarljósi í rannsókninni: 1. Hvernig er staðið að kynjajafnréttismenntun með elstu börnum í leikskólunum sex? 2. Hvert telja kennarar elstu barna í leikskólunum hlutverk leikskólans vera í jafnréttisuppeldi barnanna? Samkvæmt rannsóknum sem þessi ritgerð byggist á virðist sem vinna gegn staðalímyndum kynjanna í leikskólum hér á landi sé af skornum skammti. Af þeirri ástæðu taldi höfundur viðfangsefni rannsóknarinnar mikilvægt og ákvað að rannsaka hvernig unnið er að þessu málefni í sex leikskólum á höfuðborgarsvæðinu. Rannsóknin byggist að mestu á viðtölum en einnig voru gerðar stuttar vettvangsathuganir. Viðmælendur voru alls sjö leikskólakennarar úr sex leikskólum. Viðmælendur voru valdir með kerfisbundinni aðferð úr fimm bæjarfélögum á höfuðborgarsvæðinu. Unnið var úr gögnunum með þemagreiningu og komu fram fjögur meginþemu: Samskipti, fyrirmyndir, umhverfið og orðræða og menntun. Rannsóknin bendir til þess að kynjajafnréttismenntun elstu barnanna í þessum sex leikskólum sé að mestu ómeðvituð, einstaklingsbundin og fremur ómarkviss. Töldu viðmælendur að kynjajafnréttismenntunin færi að mestu fram í samræðu við börnin í dagsins önn. Hins vegar sýna niðurstöður fram á margvíslega starfsemi í daglegu starfi leikskólanna, sem stuðlar að kynjajafnréttismenntun barnanna. Niðurstöður rannsóknarinnar benda einnig til þess að vöntun sé á kynjafræðilegri þekkingu kennaranna. Töldu kennararnir vanta aðgengi að námsefni í tengslum við kynjajafnréttismenntun fyrir leikskólastarf. Er það í samræmi við starfendarannsóknir og skýrslur sem hafa verið unnar í tengslum við jafnréttiskennslu hér á landi. Þá kom fram að áhrif samfélagsins í formi staðalímynda og áhrif úr menningu samfélagsins séu talsverð innan leikskólanna. Er það í samræmi við þær rannsóknir sem lagðar voru til grundvallar í þessari rannsókn. Viðtölin voru mjög efnisrík og vettvangsathuganirnar gáfu góða innsýn í starf deilda viðmælenda. Niðurstöður rannsóknarinnar veita gagnlega innsýn í hvað sé hægt að gera í daglegu leikskólastarfi þegar kemur að kynjajafnréttismenntun ungra barna. Er það einlæg ósk höfundar að þessi rannsókn dýpki og opni umræðuna um þennan þátt jafnréttismenntunar ungra barna, sýni það starf sem er unnið á vettvangi í dag og hvað væri hægt að gera til að auka markvissa kynjajafnréttismenntun í leikskólum.

Author dc:creator

• Sólveig Björg Pálsdóttir 1987-

Contributors dc:contributor

• Háskóli Íslands

• Meistaraprófsritgerðir
• Menntunarfræði leikskóla
• Jafnréttismál
• Leikskólafræði

Language dc:language.iso

is

Handle dc:identifier.uri

http://hdl.handle.net/1946/34182

OAI identifier oai:identifier

oai:skemman.is:1946/34182