Bótaábyrgð vinnuveitenda vegna uppsagna sem tengjast kynferðislegri áreitni, kynbundinni áreitni og ofbeldi

Umræðan um áreitni og ofbeldi á vinnustöðum hófst ekki að alvöru fyrr en haustið 2017 þegar #metoo byltingin fór af stað á samfélagsmiðlum, þar sem konur greindu frá kynferðisofbeldi og kynferðislegri áreitni á vinnustöðum. Í kjölfarið var nokkrum einstaklingum sagt upp störfum vegna ásakana um kynferðislega áreitni á vinnustað. Reglugerð nr. 1009/2015 um aðgerðir gegn einelti, kynferðislegri áreitni, kynbundinni áreitni og ofbeldi á vinnustöðum hefur að geyma ítarleg ákvæði um það hvernig vinnuveitendum beri að koma í veg fyrir slíka háttsemi á vinnustað, auk málsmeðferðarreglna sem vinnuveitendum ber að fylgja áður en tekin er ákvörðun um að segja starfsmanni upp störfum. Markmið ritgerðarinnar er að varpa ljósi á hvort vinnuveitandi geti orðið bótaábyrgur vegna uppsagna sem tengjast kynferðislegri áreitni, kynbundnu áreitni eða ofbeldi. Í þessu samhengi verður sérstaklega litið til þess hvort vinnuveitandi geti orðið bótaábyrgur vegna brots á málsmeðferðarreglum reglugerðar nr. 1009/2015. Helstu niðurstöður ritgerðarinnar eru, að hafi starfsmanni verið sagt upp störfum vegna meintra ásakana um kynferðislega áreitni, kynbundna áreitni eða ofbeldi á vinnustað og uppsögn ekki byggst á efnislega réttum forsendum og því ekki á lögmætum grundvelli, getur uppsögnin talist ólögmæt og vinnuveitandi bakað sér bótaábyrgð gagnvart viðkomandi starfsmanni. Við mat á ólögmæti uppsagnar vegur þungt hvort vinnuveitandi hafi brotið gegn málsmeðferðarreglum reglugerðar nr. 1009/2015 en það kann að hafa áhrif við mat á ólögmæti uppsagnar. Hafi starfsmanni verið sagt upp með ólögmætum hætti í slíkum málum sem hér um ræðir getur hann einna helst átt rétt til miskabóta vegna ólögmætrar meingerðar gegn æru sbr. b-lið 1. mgr. 26. gr. skaðabótalaga nr. 50/1993. Það er einkum vegna þess að ekki eru gerðar jafn ríkar kröfur til sönnunar um tilvist miskans og um bætur vegna fjártjóns. Geti starfsmaður þó sýnt fram á fjártjón með viðhlítandi grundvelli kann hann að eiga rétt til skaðabóta vegna ólögmætrar uppsagnar.

Author dc:creator

• Íris Fanney Sindradóttir 1996-

Contributors dc:contributor

• Háskólinn í Reykjavík

• Lögfræði
• Meistaraprófsritgerðir
• Skaðabótaréttur
• Vinnuréttur
• Kynferðisleg áreitni
• Ofbeldi

Language dc:language.iso

is

Handle dc:identifier.uri

http://hdl.handle.net/1946/41813

OAI identifier oai:identifier

oai:skemman.is:1946/41813