„Þau verða nú að læra eitthvað hjá þér í vetur!“: Sjálfsprottinn leikur sem námsleið barna í náttúrulegu umhverfi

Færst hefur í aukana að formlegir kennsluhættir grunnskólanna séu notaðir í leikskólastarfi, með þá hugsun að verið sé að undirbúa börn undir grunnskólagöngu sína. Jón Torfi Jónasson (2006) hefur notað hugtakið bóknámsrek (e. academic drift) í rannsóknum sínum, hann bendir á að þessi þróun stuðli að samruna á milli menntakerfa og hvert skólastig þróist þá ekki í samræmi við þær áherslur sem þeim ber að vinna eftir. Það kemur skýrt fram í Aðalnámskrá leikskólanna (2011) að formlegir kennsluhættir eiga ekki heima innan veggja leikskólanna í neinu formi og halda þurfi verndarvæng yfir helstu námsleið barna sem leikurinn er. Það sé hlutverk leikskólakennara að veita börnum það rými og þann tíma sem þau þurfa til að nýta leikinn sem sína aðalnámsleið. Hér var framkvæmd starfendarannsókn í leikskóla þar sem þörf var á breyttum starfsháttum á deild elstu barna leikskólans, þar sem lögð var of mikil áhersla á formlegt nám á kostnað leiks. Markmiðið með rannsókninni var að fjölga ferðum út fyrir leikskólalóðina með það í huga að leggja áherslu á leik barnanna í náttúrulegu umhverfi. Tilgangur verkefnisins var að koma auga á þann ávinning sem kennari og börn öðlast af aukinni útiveru og rýna í hvernig nám barna fer fram í sjálfsprottnum leik í náttúrunni. Helstu niðurstöður rannsóknarinnar sýna að ávinningur barnanna og rannsakandans af aukinni útiveru er fjölþættur. Börnin styrktust sem hópur í vináttu, samskiptum, hjálpsemi og tillitssemi. Námslegur ávinningur hvers og eins barns var einnig víðtækur þar sem þau byggðu upp persónulega og fjölbreytta reynslu hvert á sínum forsendum í margvíslegum aðstæðum. Þau efldust hvert á sinn hátt hvað varðar getu, styrk og þor í leik sínum í náttúrunni. Sem kennari fann ég djúpa tengingu við börnin sem samverkamaður þeirra og félagi á allt annan hátt en birtist í starfinu innan veggja leikskólans. Í samfélagi þar sem áhersla á útiveru barna hefur minnkað sökum margra þátta, er mikilvægt að fagmenn innan leikskólanna veiti börnum tækifæri á þeirri dýrmætu reynslu sem þau geta öðlast í náttúrunni í gegnum leik. Sá mikilvægi ávinningur sem börn öðlast í náttúrunni er ómetanlegur fyrir framtíð þeirra sem lýðræðislegir borgarar.

Author dc:creator

• Kristjana Arnarsdóttir 1982-

Contributors dc:contributor

• Háskóli Íslands

• Leikskólakennarafræði
• Leikskólar
• Starfshættir
• Útivist
• Leikur

Language dc:language.iso

is

Handle dc:identifier.uri

https://hdl.handle.net/1946/50021

OAI identifier oai:identifier

oai:skemman.is:1946/50021