Þróun stafrænna lausna : meðferð og vinnsla persónuupplýsinga við sjálfvirka ákvarðanatöku

Samkvæmt 22. gr. laga nr. 90/2018 um persónuvernd og vinnslu persónuupplýsinga á skráður einstaklingur rétt á því að ekki sé tekin ákvörðun eingöngu á grundvelli sjálfvirkrar gagnavinnslu, þ.m.t. gerðar persónusniðs, sem hefur réttaráhrif að því er hann sjálfan varðar eða snertir hann á sambærilegan hátt að verulegu leyti. Markmið ritgerðarinnar er að leitast við að svara því hvaða skyldur hvíli á ábyrgðaraðila við þróun og notkun stafrænna lausna sem framkvæma sjálfvirka ákvarðanatöku. Í því skyni verður sérstaklega horft til þess að hvaða marki ábyrgðaraðila er tækt að veita skráðum einstaklingi viðunandi réttarvernd. Umfjöllun ritgerðarinnar hefst á sjónarmiðum persónuverndar, þar á meðal tilkomu tilskipunar Evrópusambandsins nr. 95/46/EC. Þar á eftir er umfjöllun um hugtök og sjónarmið upplýsingatækni, en í því felst til að mynda að útskýra þróun og ákvarðanir gervigreindar. Næst eru ákvæði persónuverndarlaganna og reglugerðar Evrópusambandsins nr. 2016/679 útskýrð ítarlega. Að því loknu tekur við umfjöllun um sjálfvirkar ákvarðanatökur en í því felst meðal annars að útskýra gerð persónusniða, að horfa til álitamála í tengslum við réttinn til útskýringar og mismununar af hálfu gervigreindar. Helstu niðurstöður ritgerðarinnar eru að persónuverndarlögin séu óskýr hvað varðar skyldur ábyrgðaraðila við sjálfvirka ákvarðanatöku. Telja má óljóst hvort að réttur til útskýringar rúmist innan persónuverndarlaganna sem og reglugerðarinnar, en ómögulegt getur verið að útskýra hvernig gervigreind komst að tiltekinni ákvörðun. Hvað varðar réttarúrræðið mannlega íhlutun má álykta að háþróuð gervigreind geti leitt til þess að einstaklingar dragi úr eigin frumkvæði til þess að rannsaka og efast um gildi ákvarðana gervigreindar. Þá má telja að svo lengi sem mismunun viðgengst í þjóðfélaginu komi hún einnig til með að viðgangast við þróun gervigreindar. Í stað þess að leggja til nýtt regluverk er tillaga höfundar sú að gervigreind verði nýr „aðili“ í regluverki persónuverndarlaganna en í því felst að lögin samanstandi því af þremur aðilum í stað tveggja: einstaklingum, lögaðilum og gervigreind.

Author dc:creator

• Berglind Einarsdóttir 1996-

Contributors dc:contributor

• Háskólinn í Reykjavík

• Lögfræði
• Meistaraprófsritgerðir
• Persónuréttur
• Persónuvernd
• Gervigreind

Language dc:language.iso

is

Handle dc:identifier.uri

http://hdl.handle.net/1946/38648

OAI identifier oai:identifier

oai:skemman.is:1946/38648