Hefur ástæða aukinnar þjónustuþarfar áhrif á útkomu fæðinga hjá konum sem fæða á Landspítala? Framskyggn ferilrannsókn

Bakgrunnur: Rannsóknir sýna að tíðni inngripa og fylgikvilla fæðinga meðal hraustra kvenna sé hærri á þverfræðilegum fæðingardeildum en á ljósmæðrastýrðum einingum eða í heimafæðingum. Til að Landspítali geti náð markmiðum sínum um að standa vörð um eðlilegar fæðingar þarf að rannsaka hvernig konum án áhættuþátta farnast á deildinni. Árið 2017 var heilsufarsflokkunarkerfi innleitt á Landspítala til að greina þjónustuþarfir kvenna en slíkt flokkunarkerfi skapar möguleika til rannsókna. Tilgangur og markmið: Tilgangur rannsóknarinnar er að styðja við þróun þjónustu við hraustar konur í fæðingarferli. Markmiðið er að kanna hvort marktækur munur sé á tíðni inngripa og fylgikvilla hjá hraustum konum sem hefja fæðingarferli á fæðingarvakt í grænum heilsufarsflokki en endurflokkast í fæðingu í rauðan flokk vegna 1/V) sterkrar verkjastillingar, 2/M) teppts framgangs og meðferðar, og 3/H) nýrra heilsufarsvandamála eða áhættuþátta. Aðferð: Rannsóknin er framvirk ferilrannsókn byggð á gögnum úr rafrænni fæðingarskráningu og heilsugátt frá 9. maí 2017 til 8. maí 2018 um allar konur sem endurflokkuðust í fæðingu á fæðingarvakt Landspítala á fyrsta ári eftir innleiðingu heilsufarsflokkunarkerfisins, alls 864 konur. Úrvinnsla gagnanna fór fram í forritinu SPSS með lýsandi tölfræði og óleiðréttri ályktunartölfræði. Niðurstöður: Fæðingarútkomur endurflokkaðra kvenna sýndu marktækan mun milli hópa. Konur í hópi V voru marktækt líklegri en konur í hinum hópunum til að verða fyrir belgjarofi í sjálfkrafa sótt, fá hita og að fóstur þeirra sýndi streitumerki. Konur í hópi M voru marktækt líklegri til að verða fyrir spangarklippingu og áhaldafæðingu. Konur í hópi H voru marktækt líklegri til að blæða meira og verða fyrir alvarlegum spangaráverkum. Ályktanir: Marktækur munur er á tíðni inngripa og fylgikvilla fæðinga eftir endurflokkunarþáttum. Þekkingin skapar grundvöll fyrir markvissari þróun þjónustu fæðingarvaktar og bætir við alþjóðlegan þekkingargrunn um tengsl inngripa og fylgikvilla í fæðingu. Rannsóknin varpar ljósi á mikilvægi samtals um val á fæðingarstað, áhrif inngripa á fæðingarferli og mikilvægi samfelldrar þjónustu ljósmæðra. Lykilorð: Heilsufarsflokkun, inngrip, fæðingarútkoma, verkjastilling, tepptur framgangur, áhættuþættir.

Author dc:creator

• Anna Lilja Valdimarsdóttir 1998-

Contributors dc:contributor

• Háskóli Íslands

• Ljósmóðurfræði
• Heilsufar
• Inngrip (lækningar)
• Fæðing
• Áhættuþættir

Language dc:language.iso

is

Handle dc:identifier.uri

https://hdl.handle.net/1946/50509

OAI identifier oai:identifier

oai:skemman.is:1946/50509