Losun kolefnis í framræstum mýrum á Norðurlandi

Mómýrar gegna gríðarlega mikilvægu hlutverki í kolefnishringrásinni og því í loftslagsmálum en framræsla á mýrum getur valdið umtalsverðri losun gróðurhúsalofttegunda. Meginmarkmið þessarar rannsóknar er að kanna kolefnislosun í þremur framræstum mýrum á Norðurlandi. Rannsakað verður hvort breytileiki sé á kolefnislosun milli og innan mýranna þriggja og leitast verður eftir því að skýra hvaða áhrifaþættir liggi þar mögulega að baki. Þeir áhrifaþættir sem eru sérstaklega teknir til skoðunar eru loftslag, vatnsbúskapur, gróðurfar, efnasamsetning kolefnis, sýrustig og fjarlægð frá áfoksuppsprettum. Til að ná markmiðum rannsóknarinnar var kolefnislosun mæld með gastæki á vettvangi, vatnssýni tekin til að mæla styrk uppleysts lífræns kolefnis í mýrunum og jarðvegssýni tekin úr efstu 30 cm jarðvegsins til ákvörðunar á hlutfalli steinefna og kolefnisforða. Þetta var gert með þessum hætti til að fá heildræna mynd af kolefnislosun mýranna. Niðurstöður rannsóknarinnar sýna fram á talsverðan breytileika í losun kolefnis milli og innan mýra. Losun kolefnis í formi CO2 var mun meiri í mýrunum tveimur nærri áfoksuppsprettum en þar var hlutfall steinefna í jarðveginum hærra og kolefnisforði lægri. Styrkur DOC var aftur á móti afgerandi mestur í mýrinni nyrst og fjærst áfoksuppsprettum þar sem kolefnisforði var meiri, og sýrustig og vatnsstaða lægri. Líklegir áhrifaþættir á breytileika kolefnislosunarinnar milli og innan mýranna þriggja eru loftslag, þ.m.t. jarðvegshitastig og vatnsbúskapur, fjarlægð frá áfoksuppsprettum, sýrustig og efnasamsetning kolefnis.

Author dc:creator

• Marta Carrasco 1999-

Contributors dc:contributor

• Háskóli Íslands

• Landfræði
• Mýrlendi
• Kolefni
• Norðurland

Language dc:language.iso

is

Handle dc:identifier.uri

http://hdl.handle.net/1946/46260

OAI identifier oai:identifier

oai:skemman.is:1946/46260