„Ennþá snýst þetta um fólkið okkar og árangur vinnustaðarins“ Áhrif Covid-19 heimsfaraldursins á mannauðsstjórnun

Þessi ritgerð fjallar um mannauðsstjórnun á tímum Covid-19 heimsfaraldurs. Markmiðið var að afla skilnings og þekkingar á reynslu mannauðsstjóra í heimsfaraldrinum, rýna í þau áhrif sem faraldurinn hafði á starf þeirra og afla upplýsinga um hvernig þeir sjá málaflokkinn þróast til framtíðar. Framkvæmd var eigindleg viðtalsrannsókn, þar sem tekin voru hálfopin viðtöl við níu starfandi mannauðsstjóra hjá litlum, meðalstórum og stórum skipulagsheildum sem voru ýmist starfandi í einkageiranum eða á opinberum vettvangi. Helstu niðurstöður rannsóknarinnar benda til þess að meginhlutverk mannauðsstjóra hafi ekki tekið miklum breytingum vegna Covid-19, en að starfið hafi orðið veigameira, flóknara og krafist aukins sveigjanleika. Heimsfaraldurinn hefur leitt til breytts vinnuumhverfis og nýrra starfshátta, sem fela í sér ýmis tækifæri en einnig áskoranir fyrir mannauðsstjóra. Niðurstöður benda jafnframt til þess að í framtíðinni muni hlutverk mannauðsstjóra einkennast í vaxandi mæli af ráðgjöf og stuðning við þá sem eru með mannaforráð og að mannauðsstjórnun verði hluti af almennri stjórnun innan skipulagsheilda. Sýn þátttakenda á framtíð málaflokksins er mismunandi. Mikill meirihluti þátttakenda taldi að mannauðsstjórnun myndi þróast, eflast og taka miklum breytingum til framtíðar. Mun færri sáu fyrir sér að mannauðsstjórnun færi í sama horf og fyrir Covid-19. Hins vegar var sameiginleg niðurstaða allra að stafrænar lausnir væru komnar til að vera. Helsti lærdómur af rannsókninni er að þrátt fyrir fordæmalausar og erfiðar aðstæður hafi mannauðsstjórar ekki misst sjónar á meginhlutverki sínu heldur sýnt sveigjanleika, verið úrræðagóðir og lausnamiðaðir til að varðveita öryggi og líðan starfsfólks og tryggja árangur skipulagsheildar sinnar.

Author dc:creator

• Rannveig Ólafsdóttir 1992-

Contributors dc:contributor

• Háskóli Íslands

• Mannauðsstjórnun

Language dc:language.iso

is

Handle dc:identifier.uri

http://hdl.handle.net/1946/39873

OAI identifier oai:identifier

oai:skemman.is:1946/39873