Árangur af breyttu verklagi í tengslum við aðgerð á holubringu: Gæðarannsókn

Bakgrunnur: Holubringa er arfgengur kvilli og er algengasta orsök aflögunar á bringu. Algengt er að notast sé við aðferð Nuss við lagfæringu holubringu en aðgerðinni fylgir minna blóðtap og aðgerðartími er styttri samanborið við aðgerðartækni Ravitch. Miklir verkir geta fylgt aðgerðinni og getur verkjastilling sjúklinga eftir Nuss aðgerð verið erfið og krefjandi. Utanbastsdeyfing er talin vera ákjósanlegasta aðferð verkjastillingar eftir aðgerð á holubringu sem völ er á en meðferðin er ífarandi og krefst nákvæms eftirlits hjúkrunarfræðinga. Hjúkrunarfræðingar er sú heilbrigðisstétt sem ver hvað mestum tíma með sjúklingum og gegna þeir lykilstöðu þegar kemur að verkjamati og verkjameðferð. Þegar árangri meðferða er ábótavant þarf að íhuga hvort ástæða þykir að skoða meðferðina sjálfa eða þá stofnanatengdu þætti sem gætu haft áhrif. Þörf fyrir gæða og umbótavinnu er gegnumgangandi í öllum heilbrigðiskerfum en innleiðing á nýju verklagi eða aðferð getur reynst erfið. Tilgangur: Tilgangur rannsóknarinnar var að kanna líðan sjúklinga eftir aðgerð á holubringu eftir að nýtt verklag tók gildi í maí 2016 og skoða hvernig gekk að fylgja nýju verklagi. Aðferð: Einstaklingum sem fóru í lagfæringu á holubringu á tveimur tímabilum, nóvember 2016 til loka mars 2017 og nóvember 2017 til loka mars 2018 var boðin þátttaka í rannsókninni. Rannsóknin var framsýn, lýsandi, langtíma, gæðarannsókn með raðfelldu úrtaki. Spurningarlisti var lagður fyrir á þremur tímapunktum eftir aðgerð ásamt því að þátttakendur voru beðnir um að halda dagbók í 10 daga eftir heimkomu. Upplýsingum var einnig safnað úr sjúkrasögukerfi og lyfjaumsjónakerfi Landspítala. Unnið var með lýsandi tölfræði. Niðurstöður: Helstu niðurstöður rannsóknarinnar voru þær að verkir og truflandi áhrif verkja voru almennt mun verri á fyrsta degi heimkomu af sjúkrahúsi en á öðrum tímapunktum. Meðalstyrkur verstu verkja á fyrsta degi eftir heimkomu var hærri en á fyrsta degi eftir aðgerð. Verkir hindruðu frekar djúpöndun og svefn á fyrsta degi eftir heimkomu í samanburði við fyrsta dag eftir aðgerð. Aukaverkarnir af völdum verkjalyfja voru mestar á fyrsta degi eftir aðgerð. Aukaverkanir minnkuðu með tímanum en voru þó enn til staðar hjá einhverjum sex vikum eftir aðgerð. Aðeins 23% útskrifuðust á öðrum degi eftir aðgerð samkvæmt nýju verklagi. Ályktanir: Nýju verklagi var fylgt að flestu leyti en helsta frávikið var dagsetning útskriftar sem yfirleitt var seinni en áætlað var. Niðurstöður benda til þess að verkjastillingu sé ábótavant á fyrsta degi eftir útskrift og aukaverkanir af völdum verkjalyfja séu of miklar. Mikilvægt er að finna árangursríkar leiðir til að meðhöndla verki og fyrirbyggja aukaverkanir eins og hægt er, bæði fyrir og eftir útskrift sjúklinga af spítala. Endurskoða þarf verklag reglulega og þörf er á stöðugum áminningum til að festa nýtt verklag í sessi. Mikilvægt er að heilbrigðisstarfsfólk fái viðeigandi fræðslu og stuðning til að fylgja nýju verklagi. Lykilorð: Holubringa, Nuss aðgerð, verkjamat, verkjameðferð, umbótastarf, gæðastarf, breyting á verklagi

Author dc:creator

• Karen Eik Sverrisdóttir 1993-

Contributors dc:contributor

• Háskóli Íslands

• Hjúkrunarfræði
• Holubrjóst
• Skurðlækningar
• Verkjameðferð

Language dc:language.iso

is

Handle dc:identifier.uri

http://hdl.handle.net/1946/30488

OAI identifier oai:identifier

oai:skemman.is:1946/30488