Er vöntun á aðgengilegra danskennaranámi fyrir kennslu í grunnskólum?

Er vöntun á aðgengilegra danskennaranámi fyrir kennslu í grunnskólum? Leitast var eftir að svara því í þessari rannsókn ásamt þeim ástæðum hvers vegna dans virðist á undanhaldi í grunnskólum landsins. Í rannsókninni var notast við megindlega rannsóknaraðferð, könnunarrannsókn, sem bætir heilmikið við núverandi þekkingu. Tvær spurningakannanir voru sendar út til að skoða áhuga og eftirspurn fyrir sérstöku danskennaranámi. Fyrri spurningakönnunin var send á alla grunnskóla landsins þar sem nokkrar spurningar tengdar danskennslu voru lagðar fyrir skólastjórnendur. Það var gert til að skoða stöðu dansins og afstöðu skólastjórnenda til danskennslu í þeirra skóla sem og mikilvægi sérstaks danskennaranáms. Seinni spurningakönnunin var send á dansskóla, danskennara og dansara, bæði í samkvæmis- og listdansi, til að skoða áhuga þeirra á danskennslu í grunnskólum og eftirspurn eftir sérstöku danskennaranámi. Niðurstöður sýndu að aðeins helmingur skóla landsins býður upp á danskennslu hjá sér og fæstir sem fastan lið inni í stundatöflu. Áhugi var þó fyrir hendi hjá þeim sem ekki voru með kennslu að fá danskennara til starfa. Þeim fannst þó ekki eins mikilvægt að kennarinn væri menntaður sérstaklega til að sinna þeirri kennslu og töldu ekki mikla þörf á sérstöku danskennaranámi fyrir grunnskóla. Hins vegar voru danskennararnir sjálfir og dansararnir á því að það væri mikilvægt að fá nám sem undirbyggi þá sérstaklega fyrir þessa krefjandi kennslu innan skólanna. Það sýnir mismunandi viðhorf til danskennslu í grunnskólum milli skólastjórenda og danskennara. Einnig er enginn dans kenndur á Menntavísindasviði Háskóla Íslands, sem menntar nær alla grunnskólakennara, þó að dansinn sé í aðalnámskrá grunnskóla. Það sýnir að efla þarf skilning og virðingu fyrir dansinum sem námsgrein og sameiginlega vakningu þarf til að gera dansinum hærra undir höfði vegna mikilvægis hans. Farið var vel yfir þann jákvæða ávinning sem það hefur að æfa dans; hann er góð forvörn, þjálfar heilann og auðveldar því námið. Hann hefur góð áhrif á andlega líðan og er mikilvæg hreyfing fyrir börnin. Hann kennir einnig mikilvæga félagslega færni, svo sem samvinnu, góð samskipti og virðingu. Allir hafa gott af því að dansa en börn hafa sérstaklega gott af því og er mjög mikilvægt að hann komist inn í alla skóla landsins til að komandi kynslóðir fái að njóta góðs af. Lykilorð: Danskennsla, grunnskóli, danskennaranám, dans, viðhorf, sjálfsmynd, sjálfstraust, virðing, samvinna, samskipti, hreyfing, samkvæmisdans, listdans.

Author dc:creator

• Erla Rut Haraldsdóttir 1980-

Contributors dc:contributor

• Háskólinn á Bifröst

• Lokaritgerðir
• Grunnskólar
• Danskennsla
• Samskiptafærni
• Færni
• Börn

Language dc:language.iso

is

Handle dc:identifier.uri

http://hdl.handle.net/1946/45141

OAI identifier oai:identifier

oai:skemman.is:1946/45141