Háflæðisúrefnismeðferð hjá börnum yngri en tveggja ára með öndunarfærasýkingar á Landspítala 2020–2024: Afdrif og hjúkrunarþarfir

Bakgrunnur: Sýkingar í neðri loftvegum, einkum berkjungabólga af völdum RS-veiru, eru algeng orsök innlagna barna á sjúkrahús. Meðferðin felst fyrst og fremst í stuðningsmeðferð, þar sem hjúkrun gegnir lykilhlutverki í eftirliti, mati á ástandi barns og framkvæmd meðferðar. Á undanförnum árum hefur háflæðisúrefnismeðferð fest sig í sessi sem mikilvægt meðferðarúrræði enda talin örugg og að hún þolist almennt vel. Þrátt fyrir aukna notkun er takmörkuð þekking á raunverulegu umfangi og klínískri framkvæmd hér á landi. Slík þekking er mikilvæg til að skilja hvernig meðferðinni er beitt í klínísku samhengi, þar á meðal í hjúkrun, og hvaða áhrif hún hefur á skipulagningu meðferðar og afdrif sjúklinga. Markmið: Markmið rannsóknarinnar var að skoða umfang og framkvæmd háflæðisúrefnismeðferðar á Landspítala hjá innlögðum börnum yngri en tveggja ára með öndunarfærasýkingar og lýsa afdrifum þeirra. Aðferðir: Rannsóknin var afturskyggn og náði til allra barna yngri en tveggja ára sem lögðust inn á Landspítala af bráðamóttöku barna með ICD-10 greiningarnar J00–J99 og undirflokka og voru meðhöndluð með háflæðisúrefnismeðferð á árunum 2020–2024. Gögn voru fengin frá Vöruhúsi gagna Landspítalans og sjúkraskrám. Notuð var lýsandi tölfræði og viðeigandi tölfræðipróf í R. Niðurstöður: Úrtakið samanstóð af 851 innlögn hjá 701 barni sem uppfyllti inntökuskilyrði rannsóknarinnar. Háflæðisúrefnismeðferð var veitt 161 barni í 183 innlögnum (21,5%). Meðalaldur barna sem fengu háflæðisúrefnismeðferð var 8,8 mánuðir og 56,3% voru drengir. Hlutfall innlagna þar sem háflæðisúrefnismeðferð var beitt jókst á rannsóknartímabilinu, úr 13,0% árið 2020 í 27,6% árið 2024 með marktækri línulegri aukningu (p = 0,004). Samhliða þessu styttist bæði tímalengd háflæðisúrefnismeðferðar (miðgildi 59,0 klst.) og legutími (miðgildi 5,0 dagar). RS-veira var algengasta orsök öndunarfærasýkinga (61,7% innlagna). Þrátt fyrir að 32,2% innlagna þurftu gjörgæsludvöl var frekari stigmögnun á öndunarstuðningi sjaldgæf (10,9%). Ályktanir: Niðurstöðurnar benda til aukinnar notkunar háflæðisúrefnismeðferðar hjá börnum yngri en tveggja ára á rannsóknartímabilinu, samhliða styttri meðferð og legu. Aukið umfang kallar á skýra verkferla og gott skipulag til að tryggja samfellu og öruggt flæði sjúklinga. Hjúkrun gegnir þar mikilvægu hlutverki. Áframhaldandi þróun og samræming klínískra verkferla er því nauðsynleg til að styrkja hlutverk hjúkrunar í eftirliti, framkvæmd og skipulagningu háflæðisúrefnismeðferðar. Lykilorð: Öndunarfæraeinkenni, berkjungabólga, háflæðisúrefnismeðferð, börn, barnahjúkrun, bráðahjúkrun, bráðamóttaka, gjörgæsla, nýburagjörgæsla

Author dc:creator

• Hulda Rós Arndísardóttir 1997-

Contributors dc:contributor

• Háskóli Íslands

• Hjúkrunarfræði
• Öndunarfærasjúkdómar
• Barnahjúkrun

Language dc:language.iso

is

Handle dc:identifier.uri

https://hdl.handle.net/1946/52603

OAI identifier oai:identifier

oai:skemman.is:1946/52603