ALKBH3 and FTO: New Epitranscriptomic Regulators of DNA Double-Strand Break Response

Í þessari rannsókn er hlutverk ALKBH3 og FTO í viðgerðum á tvíþátta DNA brotum skoðað. Tvíþátta DNA brot eru meðal alvarlegustu skemmda sem frumurnar okkar verða fyrir. Ef ekki er gert við þessar skemmdir, eða ranglega gert við, geta þær leitt til stökkbreytinga, litningayfirfærsla, og sjúkdóma t.d. krabbameins. Nýleg rannsókn frá rannsóknarhópnum okkar sýndi fram á að ALKBH3 er metýlerað á stýrilsvæði í ~20% brjóstakrabbameina og að sterk fylgni sé milli aukins hlutfalls metýleringa og verri lífslíkum. Einnig hafa frumgögn hópsins bent til þess að ALKBH3 og FTO spili hlutverk í að viðhalda próteintjáningu RNF168 með sviperfðastjórnun, en slíkt er mikilvægt til að viðhalda stöðugleika erfðaefnisins og skilvirkum viðgerðum á tvíþátta DNA brotum. Í dag er hlutverk ALKBH3 og FTO í brjóstakrabbameinum óþekkt og orsökin bakvið verri lífslíkur brjóstakrabbameinssjúklinga sem skortir ALKBH3 er óljós. Þar af leiðandi er tilgangur rannsóknarinnar að skilgreina hlutverk ALKBH3 og FTO í viðgerðum á tvíþátta DNA brotum, ásamt mögulegum áhrifum þeirra á lyfjameðferðir og framvindu brjóstakrabbameina. Með því að meta skilvirkni viðgerða á tvíþátta DNA brotum bendir tap á ALKBH3, FTO og RNF168 til þess að jafnvægi milli viðgerðarferla raskist og þ.a.l. mögulega eykur óstöðugleika erfðaefnisins. Einnig, með því að framkvæma lífvænleikatilraunir, benda niðurstöður okkar til þess að skortur á ALKBH3, FTO og RNF168 auki næmi gegn meðferðarlyfjunum Mitomycin C og Neocarzinostatin. Þá þykir áhugavert að frumur sem skortir ALKBH3 sýna fram á ónæmi gegn meðferð með PARP hindrum, tegund markvissrar krabbameinsmeðferðar sem hefur verið notuð gegn krabbameinum sem hafa galla í endurröðunarviðgerð. Því ályktum við að ALKBH3 og FTO hafi mögulegt hlutverk í viðgerðum á tvíþátta DNA brotum ásamt því að eiga möguleika til að nýtast sem lífvísar fyrir lyfjameðferð. Við væntum þess að rannsóknin sé upphafspunktur fyrir áframhaldandi rannsóknir á ALKBH3 í tengslum við ónæmi gegn PARP hindrum, sem væri mögulega nýtt hlutverk fyrir þetta prótein.

Author dc:creator

• Birta Dröfn Jónsdóttir 1996-

Contributors dc:contributor

• Háskóli Íslands

• Líf- og læknavísindi
• Frumur
• Brjóstakrabbamein

Language dc:language.iso

en

Handle dc:identifier.uri

https://hdl.handle.net/1946/48664

OAI identifier oai:identifier

oai:skemman.is:1946/48664