Næringarástand einstaklinga í þjónustu heimahjúkrunar á höfuðborgarsvæðinu

Bakgrunnur og markmið: Vannæring er alvarlegt ástand sem orsakast af skorti á inntöku eða upptöku næringar sem getur leitt til skertrar líkamlegrar og andlegrar starfsemi. Eldri fullorðnir (≥65 ára) hafa tilhneigingu til að verða útsettari fyrir næringarskorti sem tengist aldurstengdum breytingum. Vannæring meðal aldraðra er krefjandi heilsufarsvandamál sem tengist ekki aðeins auknum sjúkdómum og dánartíðni, heldur einnig færniskerðingu sem hefur áhrif á sjálfsbjargarviðleitni og almenn lífsgæði. Hætta á vannæringu meðal aldraðra í þjónustu hjá heimahjúkrun á höfuðborgarsvæðinu hefur ekki verið metin hérlendis en erlendar rannsóknir benda til að allt að 60% af þessum hópi sé í mikilli áhættu fyrir vannæringu. Markmið rannsóknarinnar var að meta áhættu fyrir vannæringu hjá einstaklingum (≥65 ára) í þjónustu hjá heimahjúkrun á höfuðborgarsvæðinu. Aðferðir: Um er að ræða lýsandi þversniðsrannsókn. Úrtak rannsóknarinnar eru skjólstæðingar (n=200) heimahjúkrunar á höfuðborgarsvæðinu (≥65 ára). Skjólstæðingarnir voru skimaðir fyrir áhættu á vannæringu með gildismetnu skimunareyðublaði. Þeir einstaklingar sem metnir voru með sterkar líkur á vannæringu voru skoðaðir nánar og greindir sammkvæmt alþjóðlegum greiningarviðmiðunum fyrir vannæringu (GLIM). Hluti hópsins (n=10) fékk heimsókn þar sem líkamssamsetningarmæling var framkvæmd auk þess sem stuttum spurningarlista var svarað. Niðurstöður: Samkvæmt skimunareyðublaði voru 73 (36,5%) einstaklingar sem eru í þjónustu hjá heimahjúkrun með sterkar líkur á vannæringu og 52 (26%) með ákveðnar líkur. Samkvæmt alþjóðlegum greiningarviðmiðunum (GLIM) voru 47 (23,5%) vannærðir og 38 (19,5%) með alvarlega vannæringu. Niðurstöður líkamssamsetningarmælinganna sýndu að 9 (90%) af þeim sem voru mældir reyndust vera langt undir GLIM viðmiðunum fyrir FFMI (kg/m2) eða að meðaltali 13,7 (CI [12,7;14,7]) og 9 (90%) voru vannærðir samkvæmt GLIM viðmiðunum. Ályktun: Þetta er fyrsta rannsóknin sem kannar áhættu fyrir vannæringu meðal aldraðra sem að fá heimahjúkrun á höfuðborgarsvæði Íslands. Niðurstöður rannsóknarinnar sýndu að mikill meirihluti hópsins er með ákveðnar eða sterkar líkur á vannæringu og fjórðungur hópsins var greindur með vannæringu samkvæmt GLIM viðmiðunum. Eldri (≥65 ára) skjólstæðingar í þjónustu hjá heimahjúkrun eru viðkvæmur hópur þegar kemur að áhættu fyrir vannæringu og þarfnast sérstakrar athygli og eftirfylgni, þá helst eftir nýlega sjúkrahúsinnlögn.

Author dc:creator

• Harpa Harðardóttir 1998-

Contributors dc:contributor

• Háskóli Íslands

• Næringarfræði
• Næringarskortur
• Aldraðir

Language dc:language.iso

en

Handle dc:identifier.uri

http://hdl.handle.net/1946/47305

OAI identifier oai:identifier

oai:skemman.is:1946/47305