„Ofbeldi er bara orðið hluti af okkar starfi“: Reynsla og upplifun félagsráðgjafa sem hafa orðið fyrir andlegu ofbeldi af hálfu skjólstæðinga

Markmið rannsóknarinnar var að varpa ljósi á reynslu og upplifun félagsráðgjafa sem hafa orðið fyrir andlegu ofbeldi af hálfu skjólstæðinga í starfi sínu. Markmiðið var einnig að kanna aðdraganda, eðli ofbeldisins og afleiðingar þess á líf og starf félagsráðgjafanna ásamt því að kanna hvaða stuðning félagsráðgjafarnir fengu í kjölfarið og hvers konar öryggisráðstafanir voru til staðar í starfi þeirra. Notast var við eigindlega rannsóknaraðferð og tekin voru ellefu hálfstöðluð viðtöl við félagsráðgjafa sem hafa orðið fyrir andlegu ofbeldi af hálfu skjólstæðinga. Þátttakendur voru valdir með tilgangsúrtaki. Viðmælendur voru allir kvenkyns, á aldrinum 29-59 ára og með starfsreynslu frá einu ári upp í 20 ár. Viðmælendurnir voru allir starfandi félagsráðgjafar á Íslandi, átta störfuðu við barnavernd en hinir þrír störfuðu við félags- og heilbrigðisþjónustu. Aðdragandi ofbeldisins hjá félagsráðgjöfunum í rannsókninni var ýmist ósætti skjólstæðinga með þjónustu eða vinnubrögð. Ofbeldið lýsti sér einna helst í niðrandi ummælum, hótunum og ógnunum. Félagsráðgjafarnir í rannsókninni útskýrðu eða réttlættu ofbeldið og töldu það í sumum tilfellum vera hluta af starfi sínu. Þrátt fyrir það töldu þeir ofbeldi ekki vera algengt og sögðust ná samstarfi við skjólstæðinga í flestum tilfellum. Niðurstöður sýndu að ofbeldið gat haft ýmiss konar afleiðingar á líf og starf félagsráðgjafanna og lýstu þeir afleiðingum líkt og streitu og kvíða í kjölfarið. Flestir þátttakendur upplifðu góðan stuðning samstarfs- og yfirmanna og nýttu sér einnig handleiðslu af einhverju tagi. Niðurstöðurnar leiddu þó í ljós að æðri yfirmenn áttu til að sýna skilningsleysi og tóku ofbeldinu ekki nógu alvarlega að mati þátttakenda. Niðurstöðurnar benda einnig til þess að verkferlar varðandi andlegt ofbeldi séu ekki til staðar á vinnustöðum félagsráðgjafanna og öryggisverkferlar einnig óskýrir.

Author dc:creator

• María Benediktsdóttir 1994-

Contributors dc:contributor

• Háskóli Íslands

• Félagsráðgjöf
• Félagsráðgjafar

Language dc:language.iso

is

Handle dc:identifier.uri

http://hdl.handle.net/1946/40110

OAI identifier oai:identifier

oai:skemman.is:1946/40110