Konur af erlendum uppruna sem verða fyrir heimilisofbeldi: Stuðningsþarfir og hlutverk hjúkrunarfræðinga

Bakgrunnur: Í þessari fræðilegu samantekt var sjónum beint að rannsóknum um konur af erlendum uppruna og heimilisofbeldi sem þær verða fyrir. Lögð var áhersla á þær hindranir og hvata sem letja konur til að leita sér aðstoðar vegna heimilisofbeldis. Innflytjendum hefur fjölgað mikið á Íslandi síðastliðin ár og er því vert að skoða þær stuðningsþarfir sem konur af erlendum uppruna, sem búsettar eru á Íslandi, þurfa til þess að búa við heilsusamlegt líf í nýju umhverfi. Tilgangur og markmið: Tilgangur ritgerðarinnar er að öðlast dýpri þekkingu á aðstæðum kvenna af erlendum uppruna hér á landi og hvað það er sem einkum hindrar þær í að leita sér aðstoðar. Skoðaðar verða íslenskar og erlendar rannsóknir um þetta efni, heimilisofbeldi sem konur af erlendum uppruna verða fyrir, og sjónum beint að því hvaða möguleika hjúkrunarfræðingar hafi til að styðja við þennan hóp og fjölskyldur þeirra. Aðferðir: Verkefnið er fræðileg samantekt. Leitað var að heimildum í fræðibókum og einnig í gagnasöfnunum Pubmed og Google scholar á tímabilinu janúar til apríl 2021. Niðurstöður: Það eru margar hindranir sem hafa áhrif á hvort konur af erlendum uppruna leiti sér aðstoðar vegna heimilisofbeldis. Tungumálaörðugleikar, ófullnægjandi aðlögun, félagsleg einangrun, menningarmunur, fjárhagsleg staða og margt fleira getur komið í veg fyrir að þær leitist eftir aðstoð. Allir þessir þættir gera að verkum að ólíklegt er að konur af erlendum uppruna leiti sér aðstoðar. Hjúkrunarfræðingar eru í lykilstöðu til að skima fyrir heimilisofbeldi, en hlutverk þeirra er að fræða, leiðbeina og styðja við þær ákvarðanir sem skjólstæðingur tekur, hvort sem hann er sammála þeirri ákvörðun eða ekki. Ályktun: Með þessari fræðilegu samantekt leitast höfundar við að varpa ljósi á stöðu kvenna af erlendum uppruna á Íslandi og benda jafnframt á hvers konar aðstoð þær þurfi á að halda í mjög svo krefjandi aðstæðum. Framtíðarsýn höfunda væri að upplýsa erlendar konur betur um úrræði sem standi þeim til boða vegna heimilisofbeldis, til dæmis með fræðslubæklingi. Þá mætti hugsanlega, opna Alþjóðaþjónustumiðstöð með þverfaglegri teymisvinnu íslenskra og erlendra fagaðila. Þá leiddi samantekt höfunda í ljós að skortur er á íslenskum rannsóknum um konur af erlendum uppruna sem verða fyrir heimilisofbeldi og er mikilvægt að bregðast við því. Lykilorð: Kvenkyns innflytjendur, kvenkyns innflytjendur og félagsleg einangrun, aðlögun innflytjenda, ofbeldi gagnvart kvenkyns innflytjendum, hlutverk hjúkrunarfræðinga.

Authors dc:creator

• Sandra Ósk Kristjánsdóttir 1994-
• Katrín Brynjarsdóttir 1995-

Contributors dc:contributor

• Háskóli Íslands

• Hjúkrunarfræði

Language dc:language.iso

is

Handle dc:identifier.uri

http://hdl.handle.net/1946/38441

OAI identifier oai:identifier

oai:skemman.is:1946/38441