„það er þúst eins og ég sé eitthvað minni mamma af því að ég er bara einhver krakki“ : reynsla lítt skólagenginna, ungra mæðra af lágstétt af samskiptum við skóla barna sinna

Viðfangsefni þessarar rannsóknar er að skoða sjónarhorn ungra mæðra sem tilheyra lágstétt og eiga stutta skólagöngu að baki. Hvar þær eru staddar þegar kemur að viðhorfi gagnvart skólagöngu barna sinna. Skoðað verður hvernig þær upplifa viðmót og samskipti skólastofnanna gagnvart sér og hvaða tilfinningar vakna þegar þær eru í samskiptum við menntastofnannir barna sinna og starfsfólk þar. Einnig verða skoðaðar þær áskoranir sem þeim mæta og hvaða bjargráð þessar ungu mæður hafa. Kenningarammi Bourdieu var nýttur til þess að skoða betur stöðu ungu mæðranna með áherslu á menningar-, fjármagns- og félagsauð. Til viðbótar var hugtak Diane Reay um tilfinningaauð nýtt til þess að ná betur utan um áhrif tilfinninga mæðranna gagnvart skólastofnunum barna þeirra. Hugtak Beverly Skeggs um virðingasess er einnig hluti af fræðilega bakgrunni þessa verkefnis. Fyrir þessa rannsókn voru tekin viðtöl við níu konur sem eiga það sameiginlegt að hafa eignast barn fyrir tvítugt. Mæðurnar eiga börn um og á miðstigi grunnskóla. Þær tilheyra lágstétt og eiga þær stutta skólagöngu að baki. Viðtölin voru svo greind með þemagreiningu. Mikilvægt er að sjá hvar þessi hópur mæðra stendur og skoða þeirra reynslu til þess að greina þá hvernig betur megi hlúa að þeim ef þörf er á. Helstu niðurstöður rannsóknarinnar benda til þess að mæðurnar hafi almennt séð jákvætt viðmót gagnvart skólastofnunum barna sinna. Þó hafa þær þá skoðun að heimanám barnanna sé of mikið og hafi neikvæð áhrif á þann tíma sem þær verja með börnum sínum. Mæðurnar fundu ekki fyrir mismunun eða neikvæðu viðhorfi frá kennurum en höfðu þó margar orð á því að þær næðu betur til yngri kennara frekar en þeirra eldri. Margar mæðurnar eiga börn sem gengið hafa í gegnum greiningarferli og er meirihluti barnanna með einhverskonar röskun eða fötlun. Mæðurnar eru almennt ánægðar með ferlið og létti þeim við niðurstöður þess. Þær líta jákvæðum augum á greiningu barna sinna og sjá það sem einhverskonar bjargráð þar sem það skapar tengsl við sérfræðinga á sviði menntunnar og fá börn þeirra einnig aukinn stuðning. Félagsauður mæðranna liggur mestur hjá þeirra eigin mæðrum og leita þær einna helst til þeirra þegar þær þurfa á stuðningi eða upplýsingum að halda. Skortur þeirra á menntun gerði það að verkum að mæðurnar sáu sig fastar í sinni stöðu og fannst þeim þær ekki eiga tækifæri á að sækja sér frekari menntun. Þær eigi erfitt með að finna sér vinnu sem gefi þeim þann fjármagnsauð sem þær þurfi.

Author dc:creator

• Kristín Kolbrún Kolbeinsdóttir 1987-

Contributors dc:contributor

• Háskóli Íslands

• Meistaraprófsritgerðir
• Foreldrafræðsla og uppeldisráðgjöf
• Eigindlegar rannsóknir
• Félagsleg staða
• Menntun

Language dc:language.iso

is

Handle dc:identifier.uri

http://hdl.handle.net/1946/31963

OAI identifier oai:identifier

oai:skemman.is:1946/31963