Aðstaða og úrræði fyrir ADHD nemendur í framhaldsskóla

Ritgerð þessi er lokaritgerð til B.ed prófs í kennarafræðum og fjallar um stöðu barna og ungmenna sem greinst hafa með ADHD og hvaða þjónusta bíður þeirra á skólastigunum þrem, leikskóla, grunnskóla og framhaldsskóla. Fjallað er um hversu skólakerfið er oft illa í stakk búið varðandi þjónustu við þennan tiltekna nemendahóp. Hver skóli kemur sér upp eigin bjargráðum undir stjórn skólastjórnenda, sérkennara og þroskaþjálfa auk þess sem námsráðgjafi er í flestum skólum. Í Reykjavík geta skólar leitað eftir sérfræðiþjónustu á svo kölluðum þjónustumiðstöðvum borgarinnar. Utan Reykjavíkur geta skólar leitað til skólaskrifstofu viðkomandi sveitarfélags eftir slíkri aðstoð. Höfundur ritgerðarinnar tók viðtal við mismunandi fagaðila, annarsvegar var það við sérfræðing innan skólaþjónustunnar og náms- og kennslustjóra í grunnskóla. Markmið viðtalanna var að átta sig á því ferli og þeim úrræðum sem bjóðast í leik- og grunnskólum eftir að greining liggur fyrir. Hins vegar var tekið viðtal við þrjá námsráðgjafa framhaldskóla, valda af handahófi, til að fræðast um helstu úrræði og aðstöðu sem í boði er fyrir ADHD nemendur á framhaldskólastigi. Orsakir ADHD eru líffræðilegar og má að mestu leiti rekja til erfða, algerlega óháð greind. Röskunin veldur verulegri truflun á lífi og umhverfi þeirra sem greinast með ADHD og margir hverjir þurfa mikla aðstoð í námi auk lyfjagjafar og sálfræðilegrar meðferðar. Talið er að eitt af hverjum tíu börnum og unglingum sé með ADHD og einn af hverjum 20 meðal fullorðinna (Gísli Baldursson, Páll Magnússon, H.Magnús Haraldsson og Matthías Halldórsson, 2012). Fylgikvillar eru mjög algengir og 50-70% þeirra sem greinast með ADHD glíma einnig við annan sálrænan vanda (Ingibjörg Karlsdóttir, 2012). Lyf og sálfræðileg meðferð virðist aðeins skila tilætluðum árangri meðan á henni stendur. Hamlandi áhrif einkenna ADHD og fylgikvilla röskunarinnar fylgja mörgum hverjum á unglings- og fullorðinsárum. Þjónustuúrræði og kennsluaðstæður innan skólanna skipta sköpum um gengi ADHD nemenda og framtíð þeirra innan skólakerfisins. Foreldrar, kennarar og annað starfsfólk þarf að fá haldgóðar upplýsingar og fræðslu um hvernig eigi að takast á við ADHD. Aukin vitneskja og samstarf heimilis og skóla eykur líkur á góðum námsárangri.

Author dc:creator

• Jónas Hörður Árnason 1980-

Contributors dc:contributor

• Háskóli Íslands

• Grunnskólakennarafræði
• ADHD
• Framhaldsskólar
• Framhaldsskólanemar

Language dc:language.iso

is

Handle dc:identifier.uri

http://hdl.handle.net/1946/16628

OAI identifier oai:identifier

oai:skemman.is:1946/16628