Allt rýmið utan veggjanna: Rannsókn á upplifun tónlistarkonu af samfélagsmiðuðum tónlistarverkefnum

Ritgerð þessi lýsir sjálfsetnógrafískri rannsókn tónlistarkonu á upplifun sinni af bæði formlegu tónlistarnámi og óformlegu. Í ritgerðinni er leitast við að varpa ljósi á þá kerfislægu þætti í formlegu námi sem höfðu mótandi og neikvæð áhrif á faglega sjálfsmynd höfundar. Þar má nefna þröngar skilgreiningar á tónlistarlegri færni og umhverfi sem ýtir undir loddaralíðan (e. imposter phenomenon). Einnig er upplifun höfundar af samfélagsmiðuðum tónlistarverkefnum á vegum MetamorPhonics skoðuð, en þau flokkast sem óformlegt nám. Þar upplifði höfundur skýran tilgang og valdeflingu, og niðurstöður rannsóknarinnar benda til þess að styrkleikamiðuð nálgun, áhersla á frumsköpun tónlistar og aukin áhersla á félagslega þætti tónlistarsköpunar hafi haft jákvæð áhrif á sjálfsmynd höfundar. Upplifunin er sett í samhengi við viðtöl við aðra stjórnendur MetamorPhonics sem hafa sambærilega reynslu, sem og í fræðilegt samhengi. Rannsóknin byggir á aðferðum sjálfsetnógrafíu þar sem skrif eru nýtt sem rannsóknaraðferð og verkfæri til greiningar. Nýttar eru aðferðir úr framköllunar-sjálfsetnógrafíu (e. evocative autoethnography), þar sem gögn eru sett fram í formi einlægra smásagna sem lýsa upplifun höfundar. Markmið þeirra er að vekja hughrif og dýpka skilning lesanda á upplifun höfundar. Rannsókninni er ætlað að vera innlegg í umræður um sjálfsmynd tónlistarfólks og uppbyggingu náms. Takmörkuð umfjöllun hefur verið til staðar á íslensku um samfélagsmiðuð tónlistarverkefni, og er það von höfundar að rannsóknin stuðli að vitundarvakningu og leggi sitt af mörkum til fræðilegrar umræðu á þessu sviði hérlendis. Lykilorð: sjálfsetnógrafía, samfélagsmiðuð tónlistarverkefni, formlegt tónlistarnám, loddaralíðan, valdefling, sjálfsmynd

Author dc:creator

• Laufey Sunna Guðlaugsdóttir 1992-

Contributors dc:contributor

• Háskólinn á Bifröst

• Sjálfsmynd (sálfræði)
• Tónlistarnám
• Valdefling
• Loddaralíðan

Language dc:language.iso

is

Handle dc:identifier.uri

https://hdl.handle.net/1946/53831

OAI identifier oai:identifier

oai:skemman.is:1946/53831