Leikskólinn, þjónustustofnun í heimsfaraldri? : sýn og reynsla aðstoðarleikskólastjóra á fagmennsku starfsfólks og þjónustuhlutverk leikskólans á tímum heimsfaraldurs Covid

Árið 2020 skall á heimsfaraldur. Þann 6. mars 2020 lýstu íslensk yfirvöld yfir neyðarstigi Almannavarna. Vegna heimsfaraldursins urðu breytingar í samfélaginu og stóð leikskólastigið frammi fyrir breyttum starfsaðstæðum vegna sóttvarnaaðgerða. Leikskólum var haldið opnum í faraldrinum en foreldrum barna var meinaður aðgangur að leikskólanum. Leikskólakennarar og starfsfólk gat ekki sótt fundi og námskeið vegna samkomutakmarkana. Markmiðið rannsóknarinnar var að fá innsýn í það hvernig aðstoðarleikskólastjórum gekk að halda faglegu starfi gangandi í leikskólum á tímum heimsfaraldurs. Rannsakað var hvort áhrifa heimsfaraldurs mætti greina í störfum aðstoðarleikskólastjóra og þá hvernig. Rafræn viðtöl voru tekin við sex aðstoðarskólastjóra í sex ólíkum leikskólum víðs vegar um Ísland. Því næst voru viðtölin þemagreind. Niðurstöðurnar sýna að faglegt starf var sett til hliðar í sumum skólanna á tímum heimsfaraldurs og námstækifæri barna í tilteknum leikskólum urðu færri. Þó má einnig sjá á niðurstöðunum að fagmennskan innan sumra leikskólanna hafi eflst í faraldrinum. Þannig virðist sem aðstoðarleikskólastjórum hafi almennt gengið vel að skapa nýja fagþekkingu með því að leiða samræður innan leikskólanna. Leikskólum bar að hólfa húsnæðið niður samkvæmt fyrirmælum skólaskrifstofa en niðurstöður leiddu í ljós að leikskólarnir voru ekki nógu stórir til að slík hólfun skilaði ákjósanlegum ávinningi. Skilin milli vinnu og einkalífs urðu óljós. Samkvæmt niðurstöðum rannsóknarinnar fannst viðmælendum að þeir næðu ekki utan um öll þau verkefni sem bættust við í faraldrinum. Rannsóknin sýnir fram á að aðstoðarleikskólastjórar upplifðu mun meiri streitu og mótþróa hjá sínu starfsfólki vegna styttingu vinnuvikunnar heldur en vegna faraldursins. Í umræðu kaflanum er sýnt fram á það hvernig áskoranir tengdar faraldrinum hafa vakið starfsfólk til umhugsunar um hve mikilvægt það er að eiga í félagslegum samskiptum. Einnig er velt upp hlutverki leikskóla í faraldrinum og hvernig utanaðkomandi þættir hafa áhrif á starfsemina í leikskólum auk þeirra miðlægu breytinga sem voru teknar án samráðs við leikskólastjórnendur. Þannig virðast utanaðkomandi þættir eins og faraldurinn geta haft meiri áhrif á leikskólastarfið en þörf foreldra og samfélagsins.

Author dc:creator

• Anna Björk Marteinsdóttir 1977-

Contributors dc:contributor

• Háskóli Íslands

Language dc:language.iso

is

Handle dc:identifier.uri

http://hdl.handle.net/1946/47239

OAI identifier oai:identifier

oai:skemman.is:1946/47239