Hefur skipulagning verkefna áhrif á innleiðingu stefna? Í upphafi skal endinn skoða

Með tímanum hefur verkefnastjórnun þróast frá hefðbundinni hagnýtri nálgun yfir í kraftmeira hugtak sem kallast verkefnavæðing, þar sem ýmsir þættir í rekstri fyrirtækja eru meðhöndlaðir sem verkefni. Þessi breyting hefur verið drifin áfram af aukinni reynslu og þróun greinarinnar en verkefnamiðað skipulag er talið veita fyrirtækjum sveigjanleika og aðlögunarhæfni til að takast á við hraðar tækniframfarir, hnattvæðingu og markaðssveiflur. Miðað við framgang undanfarin ár og gríðarlegar breytingar í starfsumhverfi fyrirtækja er líklegt að verkefnavæðing muni halda áfram að móta og stjórna vinnuumhverfi framtíðarinnar. Markmið rannsóknarverkefnisins er að skoða hvernig skipulag verkefna fer fram í fyrirtækjum sem leggja áherslu á verkefnastjórnun eða verkefnamiðað skipulag. Rannsóknarspurning verkefnisins er: Hefur skipulagning verkefna áhrif á innleiðingu stefna? Til að svara rannsóknarspurningunni voru tekin viðtöl við níu viðmælendur í fyrirtækjum sem leggja áherslu á verkefnastjórnun eða verkefnamiðað skipulag. Tilgangurinn var að fá innsýn í upplifun viðmælenda á skipulagi verkefna við innleiðingu stefna. Viðmælendurnir höfðu flestir mikla þekkingu og reynslu á verkefnastjórnun og voru annaðhvort stjórnendur eða verkefnastjórar sem stýra þverfaglegum innleiðingum breytinga. Niðurstöður bentu til þess að verkefnavæðing hafi leitt til aukinnar áherslu á verkefni og verkefnamiðað skipulag sem hefur aukið mikilvægi skilvirkrar verkefnastjórnunar. Í slíku skipulagi vinna teymi þverfaglega, deila auðlindum og þekkingu og brjóta niður síló til að innleiða breytingar og nýsköpun. Verkefni eru ekki lengur einangruð innan deilda heldur er lögð áhersla á val verkefna sem samsvara stefnuáherslum fyrirtækisins. Slík uppbygging auðveldar fyrirtækjum að innleiða stefnuáherslur sínar, takast á við áskoranir og tækifæri á skilvirkan hátt. Verkefnastjórnun mun því áfram gegna lykilhlutverki í velgengni fyrirtækja sem felst ekki eingöngu í skipulagningu, framkvæmd og eftirliti verkefna til að tryggja að þeim sé lokið á skilvirkan hátt, innan umfangs, á réttum tíma og innan fjárhagsáætlunar. Áhersla þarf einnig að vera á stjórnarhætti í verkefnum, hvernig skipulagi er háttað, til þess að innleiðing stefnuáherslna fyrirtækja sé skilvirk.

Author dc:creator

• Bryndís Pjetursdóttir 1976-

Contributors dc:contributor

• Háskóli Íslands

• Verkefnastjórnun
• Fyrirtæki
• Stefnumótun
• Verkefnavæðing

Language dc:language.iso

is

Handle dc:identifier.uri

http://hdl.handle.net/1946/45805

OAI identifier oai:identifier

oai:skemman.is:1946/45805