Skólafélagsráðgjöf í grunnskólum: Farsæld barna til framtíðar

Það er sameiginlegt verkefni foreldra, kennara og samfélagsins í heild að búa börnin eins vel og unnt er undir framtíðina. Á þeim tíu árum sem börn verja alla jafna í grunnskóla fer fram mikill þroski og því mikilvægt að vel sé haldið utan um börnin í skólasamfélaginu. Það er margt sem þarf að huga að þegar kemur að farsæld barna og einkar mikilvægt að börn geti þrifist og dafnað innan skólakerfisins. Með lagabreytingum árið 2008 og innleiðingu skólastefnunnar um skóla án aðgreiningar var stigið stórt skref í átt að bættum aðbúnaði innan skóla þar sem áhersla var lögð á að pláss væri fyrir öll börn, burtséð frá þeirra aðstæðum eða persónulegum áskorunum. Aukið álag á störf kennara í kjölfar lagabreytinganna og innleiðingu skólastefnunnar um skóla án aðgreiningar hefur einkennt skólasamfélagið síðastliðin ár og á sama tíma hafa komið fram áhyggjur af stöðu barna innan þess. Rannsóknir hafa sýnt fram á að vandi barna á grunnskólaaldri sé að aukast og að fleiri börn á Íslandi séu að glíma við margvísleg vandamál og vanlíðan. Þá hefur bið eftir þjónustu einnig aukist mikið sem mikilvægt er að bregðast við. Með innleiðingu laga í þágu farsældar barna á að koma til móts við þennan vanda, með aukinni samþættingu í þjónustu við börn og þverfaglegri teymisvinnu og eiga lögin að stuðla að farsæld allra barna og tryggja réttindi þeirra. Markmið þessarar ritgerðar er að fjalla um þær lagabreytingar sem orðið hafa og hvers má vænta af nýjum lögum um samþættingu þjónustu í þágu farsældar barna. Leitað var svara við eftirfarandi rannsóknarspurningu: Hvað getur skólafélagsráðgjöf í grunnskólum lagt af mörkum í tengslum við markmið nýrra laga um samþætta þjónustu í þágu farsældar barna? Út frá helstu niðurstöðum má draga þá ályktun að félagsráðgjafar í skólum geti gegnt mikilvægu hlutverki þegar kemur að farsæld barna.

Author dc:creator

• Jóna Björg Guðmundsdóttir 1986-

Contributors dc:contributor

• Háskóli Íslands

• Félagsráðgjöf

Language dc:language.iso

is

Handle dc:identifier.uri

http://hdl.handle.net/1946/43696

OAI identifier oai:identifier

oai:skemman.is:1946/43696