Þörf fyrir foreldrafræðslu : sjónarhorn mæðra 13–16 ára barna

Á unglingsárum eykst þörf unglinga fyrir sjálfstæði frá foreldrum sínum og þeir takast á við breytingar en þetta getur reynt á samskipti foreldra og barna. Rannsóknir sýna að mæður verja meiri tíma með börnum sínum og tengjast þeim nánari böndum en feður gera. Hér á landi hefur verið lítið um framboð á foreldrafræðslu fyrir foreldra eldri barna, aðallega einskorðast fræðslan við afmörkuð viðfangsefni sem foreldrar takast á við í uppeldinu en minna um almenna foreldrafræðslu. Þessi rannsókn er hluti af stærra rannsóknarverkefni sem ber heitið Foreldrafræðsla á Íslandi: Hver er þörfin? og Hrund Þórarins Ingudóttir stýrir og leiðir. Í þessari rannsókn er leitast eftir sjónarhorni mæðra 13–16 ára barna og eru rannsóknarspurningarnar tvær: 1. Hverjar eru helstu áskoranir í uppeldi að mati mæðra 13–16 ára barna? 2. Hvernig meta þær þörf á foreldrafræðslu og stuðningi í uppeldishlutverkinu? a. Hvaða viðfangsefni telja þær að þurfi að vera í slíkri fræðslu? b. Hvernig telja þær að slíkri fræðslu og stuðningi ætti að vera háttað svo hún geti nýst þeim sem best? Notast var við megindlegar rannsóknaraðferðir í formi spurningalista. Listinn var lagður fyrir mæður 13–16 ára barna í 24 grunnskólum landsins sem voru valdir með slembiúrtaki. Skólarnir voru bæði á höfuðborgarsvæðinu (11) og landsbyggðinni (13). Alls bárust 802 svör frá mæðrum og stjúpmæðrum. Helstu niðurstöður rannsóknarinnar voru að flestar mæður (78%) upplifðu sig öruggar í foreldrahlutverkinu en á sama tíma vill meirihluti mæðra (76%) fá aukið framboð á faglegri uppeldisfræðslu. Mikill meirihluti mæðra (78%) taldi að helsta áskorunin við að ala upp 13–16 ára börn væri fólgin í því hvernig börn umgangast samfélagsmiðla og í tölvunotkun barna. Rúmlega helmingur mæðra taldi þörf á aukinni fræðslu varðandi skjánotkun barna sinna. Mæðurnar (46%) töldu einnig samskipti og samveru foreldris og barns vera áskorun í uppeldinu og helmingur mæðra taldi þörf á aukinni fræðslu og stuðningi varðandi góð samskipti á milli foreldris og barns. Mikill meirihluti (74%) mæðra vildi fá aukna fræðslu og stuðning varðandi andlega líðan barna og helmingurinn taldi líðan barna sinna vera áskorun í uppeldinu. Það kom skýrt fram að mæður vildu helst hafa aðgengi að foreldrafræðslu í gegnum skóla barnanna. Niðurstöðurnar ættu að nýtast foreldrum, börnum og þeim fagaðilum sem starfa með þeim.

Author dc:creator

• Tinna Ósk Óskarsdóttir 1990-

Contributors dc:contributor

• Háskóli Íslands

• Meistaraprófsritgerðir
• Foreldrafræðsla og uppeldisráðgjöf
• Mæður
• Foreldrafræðsla
• Unglingar
• Megindlegar rannsóknir

Language dc:language.iso

is

Handle dc:identifier.uri

http://hdl.handle.net/1946/42949

OAI identifier oai:identifier

oai:skemman.is:1946/42949