Helstu aukaverkanir mænurótardeyfingar í fæðingu: Fræðileg samantekt

Mænurótardeyfing er almennt talin vera áhrifaríkasta form verkjalyfjameðferðar í fæðingu og hefur tíðni hennar farið vaxandi með árunum, en um helmingur kvenna kjósa þessa verkjastillingu. Þrátt fyrir að hún geti verið gagnleg fyrir margar konur þá getur hún einnig haft neikvæð áhrif á framgang fæðingar, sem og aukaverkanir fyrir bæði móður og barn. Markmið þessarar fræðilegu samantektar er að kanna hverjar helstu aukaverkanir mænurótar- deyfingar í fæðingu eru, en mikilvægt er fyrir ljósmæður að þekkja vel aukaverkanir deyfingarinnar til þess að vera vakandi fyrir þeim í fæðingu. Tilgangur verkefnisins er einnig að geta frætt konur betur um mænurótardeyfingu og áhættuna sem getur fylgt henni, en með frekari þekkingu á viðfangsefninu eru auknar líkur á að konur taki upplýsta ákvörðun um val á verkjameðferð í fæðingu. Rannsóknarspurningin er því: Hverjar eru helstu aukaverkanir mænurótardeyfingar í fæðingu? Til þess að svara spurningunni var gerð fræðileg samantekt þar sem leitað var að heimildum í viðurkenndum gagnasöfnum og skilaði sú leit 27 rannsóknargreinum, sem að mestu eru fram- og afturskyggnar samanburðarannsóknir á konum í fæðingu, með og án deyfingar. Niðurstöður sýndu m.a. að marktækt auknar líkur eru á lengdu 2. stigi fæðingar, áhaldafæðingu, keisaraskurði, hríðaörvandi lyfjum, blóðþrýstingsfalli, þvagteppu í og eftir fæðingu, hækkuðum líkams- hita móður, kláða og höfuðverk. Ekki var samhljóða niðurstaða um hvort mænurótardeyfing væri marktækur áhættuþáttur fyrir spangaráverka, þ.e. ein og sér. Þrátt fyrir að ljósmæður leggi sig fram við að fyrirbyggja eða draga úr aukaverkunum eftir að mænurótardeyfing hefur verið sett upp, er ekki síður mikilvægt að þær fræði konur betur fyrir fæðingu um mænurótardeyfingu og þær aukaverkanir sem henni geta fylgt. Hugsast gæti að færri konur kysu slíka deyfingu ef þeim væri að fullu ljós sú áhætta sem getur fylgt inngripinu. Einnig er mikilvægt að ljósmæður haldi fast í hugmyndafræði sína með því að efla innri styrk og trú kvenna á eigin getu og stuðla þannig betur að lífeðlislegu ferli fæðinga.

Author dc:creator

• Aníta Rut Guðjónsdóttir 1988-

Contributors dc:contributor

• Háskóli Íslands

• Ljósmóðurfræði
• Fæðing
• Mænurótardeyfing
• Aukaverkanir lyfja

Language dc:language.iso

is

Handle dc:identifier.uri

http://hdl.handle.net/1946/30974

OAI identifier oai:identifier

oai:skemman.is:1946/30974