Lífsstílstengdir heilsufarsþættir eftir krabbameinsmeðferð

Sífellt fleiri lifa lengi eftir meðferð vegna krabbameins. Þekking á langtímaáhrifum krabbameinsmeðferða á þrek, holdafar og heilsutengd lífsgæði fólks er mikilvæg fyrir þennan vaxandi samfélagshóp. Markmið rannsóknarinnar var tvíþætt. Annarsvegar að mæla þrek, holdafar, heilsutengd lífsgæði og persónuleika D fólks sem hefur lokið við læknismeðferð vegna krabbameina undanfarin tíu ár og hinsvegar að athuga hvort þrek hafi fylgni við holdafar og heilsutengd lífsgæði hjá sama hópi. Áttatíu þátttakendur (25 – 77 ára) af báðum kynjum, sem voru í sjúkdómshléi frá, eða álitnir læknaðir af krabbameini svöruðu spurningalistum um heilsutengd lífsgæði (SF-36v2 og EQ-5D-3L), persónuleika D (DS14), heilsufar, lífsstíl og krabbameinsmeðferð. Blóðþrýstingur, líkamsþyngdarstuðull, fituprósenta, þrek metið með sex mínútna gönguprófi (6MWT) og ummál mittis og mjaðma voru mæld. Notast var við SPSS til að fá lýsandi tölfræði og við útreikning á fylgnistuðlum. Tveir af hverjum þremur þátttakendum voru með einhverja þætti holdafars yfir viðmiðunarmörkum. Rúmlega helmingur þátttakenda var yfir kjörþyngd, 66,3% voru með ummál mittis yfir viðmiðunarmörkum, 45,0% voru með hlutfall mittis og mjaðma yfir viðmiðunarmörkum. Meðal gengin vegalengd í 6MWT var 634 m +/- 83 m. Marktæk fylgni (p<0,05) mældist á milli 6MWT og holdafars ásamt flestra þátta heilsutengdra lífsgæða. Aðeins 13,8% þátttakenda mældust með persónuleika D. Það er áhyggjuefni að um tveir af hverjum þremur þátttakendum mældust með holdafar yfir viðmiðunarmörkum. Þrek, metið með 6MWT, getur gefið vísbendingu um heilsutengd lífsgæð og holdafar fólks eftir krabbameinsmeðferð og styður rannsóknin notkun á 6MWT í klínísku starfi þar sem gengin vegalengd hefur fylgni við áðurnefnda þætti. Gagnlegt væri að rannsaka frekar hvort íhlutun sem eykur þrek bætir einnig holdafar og heilsutengd lífsgæði fólks eftir krabbameinsmeðferð.

Author dc:creator

• G. Haukur Guðmundsson 1981-

Contributors dc:contributor

• Háskóli Íslands

• Íþrótta- og heilsufræði
• Meistaraprófsritgerðir
• Krabbamein
• Endurhæfing
• Þolpróf
• Holdafar
• Heilsufar
• Megindlegar rannsóknir

Language dc:language.iso

is

Handle dc:identifier.uri

http://hdl.handle.net/1946/26011

OAI identifier oai:identifier

oai:skemman.is:1946/26011