Evrópskur gervigreindarréttur : helstu álitamál og líkleg réttarþróun

Markmið ritgerðarinnar er að komast að því hvort að nýlega samþykkt reglugerð Evrópuþingsins og ráðsins (ESB) 2024/1689 um samræmdar reglur á sviði gervigreindar (gervigreindarreglugerðin) muni virka sem skyldi og hvort að setning nýrra lagareglna hafi verið nauðsynleg. Í ritgerðinni er farið yfir aðferðir sem fræðimenn og stofnanir hafa bent á að geti verið hentugar, í stað þess að treysta eingöngu á lagareglur sem geta orðið fljótt úreltar. Fjallað er um muninn á lagareglum og siðareglum en jafnframt er komið inn á lagasmíð, virkni og einkenni góðra lagareglna. Farið er yfir aðgerðir sem stjórnvöld hafa gripið til í því skyni að hafa stjórn á Internetinu og athugað hvaða lærdóm megi draga af þeim aðgerðum, en Internetið er, líkt og gervigreindin, tækni í stöðugri þróun. Í ritgerðinni er jafnframt farið yfir vinnu alþjóðastofnana og nýjan rammasáttmála Evrópuráðsins um gervigreind. Farið er ítarlega yfir ákvæði gervigreindarreglugerðarinnar en einnig eru skoðaðar aðrar tengdar reglugerðir og tilskipanir sem þegar voru í gildi innan sambandsins. Þá er farið yfir gagnrýni á gervigreindarreglugerðina, fjallað um álitamál og vandamál sem enn eru óleyst og gerður er samanburður við stefnu Bandaríkjanna og Kína í málefnum gervigreindar. Í ritgerðinni er dregin ályktun um að setning lagareglna hafi verið nauðsynleg en gervigreindarreglugerðin muni ekki virka eins og henni er ætlað að gera. Rannsóknin sýnir að texti reglugerðarinnar inniheldur glufur og undanþágur sem veitendur gervigreindarkerfa geta nýtt sér og komið sér og öðrum rekstraraðilum undan umfangsmiklum skyldum. Veitendur skipa gervigreindarkerfum sínum sjálfir í flokka og mun virkni reglugerðarinnar ráðast af því hve samvinnuþýðanleg einstaka ríki eru í því að hafa eftirlit með rekstraraðilum. Þrátt fyrir að markmið reglugerðarinnar hafi meðal annars verið að tryggja vernd lýðræðisins og réttarríkisins, eru enn ákveðnar tegundir gervigreindarkerfa leyfilegar sem geta engu að síður ógnað lýðræðinu og réttarríkinu.

Author dc:creator

• Hilmar Björn Ásgeirsson 2001-

Contributors dc:contributor

• Háskólinn í Reykjavík

• Lögfræði
• Meistaraprófsritgerðir
• Gervigreind
• Reglugerðir

Language dc:language.iso

is

Handle dc:identifier.uri

https://hdl.handle.net/1946/51065

OAI identifier oai:identifier

oai:skemman.is:1946/51065