,,Að syngja í gospelkór - hvað er svona merkilegt við það?” : um bakgrunn og viðhorf kórfélaga í íslenskum gospelkórum

Helstu markmið þessarar rannsóknar voru að skoða samsetningu og bakgrunn þeirra sem syngja í gospelkórum á Íslandi. Jafnframt var kannað hvers konar tónlistarbakgrunn og tónlistarsmekk kórfélagar höfðu, hvernig þau mátu eigin tónlistargetu, hverjar væru helstu ástæður þess að þau velji gospelkóra umfram aðra kóra og hvaða þættir kórastarfsins hefðu einkum áhrif. Í því skyni var sérstaklega fylgst með fyrsta starfsári nýstofnaðs gospelkórs við Kópavogskirkju. Fræðilegur bakgrunnur rannsóknar samanstóð annars vegar af því sem búið er að skrifa um kóratónlist á Íslandi, en það eru tvær ritgerðir önnur eftir Sigrúnu Lilju Einarsdóttur (2009) Af hverju syngur þú í kór? sem inniheldur megindlega rannsókn um ástæður þess hvers vegna meðlimir í tíu íslenskum kórum syngja í kór og BA-verkefni Veroniku Österhammer (2008) um íslenskan kórsöng, kirkjukórsöng og samfélagsleg áhrif. Hins vegar voru skoðaðar heimildir og rannsóknir um þróun kóra í vestrænum heimi og upphaf og þróun gospeltónlistar. Aðferðafræði rannsóknar samanstóð annars vegar af tilviksrannsókn þar sem tilvikið var Gospelkór Kópavogskirkju. Allar æfingar og messur voru teknar upp á myndbandsupptökuvél og eigindleg, hálfopin viðtöl voru tekin við meðlimi kórsins einu sinni en tvisvar við kórstjóra. Hins vegar var spurningakönnun send til meðlima fjögurra annarra Gospelkóra og unnið úr svörunum. Afurð þessarar vinnu er annars vegar þessi ritgerð og hins vegar drög að heimildarmynd sem er um starf Gospelkórs Kópavogskirkju. Helstu niðurstöður rannsóknarinnar benda til þess að meirihluti þátttakenda höfðu mikla ánægju af kórsöng og að almenn ánægja virtist vera með kórstjórnendur þeirra kóra sem tóku þátt. Menntunarstig þátttakenda var nokkuð hátt, sem og tónlistarmenntun og rúmlega helmingur þátttakenda höfðu sungið einsöng með kór og mátu sína tónlistargetu sem nokkuð góða almennt. Athygli vakti að popp, gospel og rokk reyndust vera þær tegundir tónlistar sem áttu hvað mest upp á pallborðið en meðalaldur þátttakenda reyndist vera nokkuð lægri en talið er almennt í blönduðum kórum en í þessu tilfelli voru 40% þátttakenda undir fertugu. Þó nokkur kynjahalli reyndist vera meðal þátttakenda en fram kom að mikill meirihluti þátttakenda voru félagslega virkir; yfir 90% voru skráð í kristin trúfélög og jákvæðir út í félagslífið almennt í sínum kór, sem og aðra þætti kórastarfsins. Í tilviksrannsókn kom í ljós að breyting varð á félagslegum tengslum kórmeðlima þegar á leið, sérstaklega eftir áramót þegar fastur kjarni var orðinn til í kórnum. Niðurstöður bentu jafnframt til þess að aukning hafi verið á kirkjusókn í óhefðbundnar messur en þó liggja ekki fyrir endanlegar tölur til samanburðar. Verkefnið og meðfylgjandi drög að heimildarmynd gefa ágætis hugmyndir um íslenska gospelkóra almennt og þær áskoranir sem felast í því að stofna kór frá grunni, sér í lagi óhefðbundinn, lítinn kór þar sem vægi einstaklingsins er mun meira en í hefðbundnum kór. Lykilorð: Gospel, gospelkór, kirkja, messa, félagsleg tengsl, vestrænt kórastarf, íslenskt kórastarf, kórstjóri, kórsöngur.

Author dc:creator

• Ragna Berg Gunnarsdóttir 1971-

Contributors dc:contributor

• Háskólinn á Bifröst

• Félagsvísindi
• Menningarstjórnun
• Gospelkórar
• Kórsöngur
• Kirkjur
• Guðsþjónustur

Language dc:language.iso

is

Handle dc:identifier.uri

http://hdl.handle.net/1946/19053

OAI identifier oai:identifier

oai:skemman.is:1946/19053