University of Zululand
Ukuvuselelwa kwesiko lokuhlonipha entsheni ensundu ikakhulukazi esizweni sakwaZulu
Abstract
dc:description.abstractUkuvuselelwa kwesiko lokuhlonipha entsheni eNsundu ikakhulukazi esizweni sakwaZulu wucwaningo oluzama ukucubungula izindlela ezingalekelela ukwakha isizwe esinenhlonipho nesimilo esihle. Isahluko sokuqala sethula indikimba ngalokho ucwaningo oluphokophelele ukukuhlaziya. Kulesi sahluko kuvezwa ilukuluku eliyimbangela yokucwaninga ngalesi sihloko. Kuphinde kuvezwe nenhloso yocwaningo okuwukukhuthaza inhlonipho entsheni. Isahluko sesibili siveza izindlela zesintu ezingalekelela ukubuyisela isiko lokuhlonipha entsheni. Lezi zindlela zesintu zihlanganisa ukugweba, ukusoma, ukuhloniphana kwezintombi nezinsizwa, ukuhlonipha kwezintombi isifo, ukubalekela nokuhlolwa kwezintombi. Lezi zindlela zesintu zineqhaza elibalulekile ezilibamba ukugqugquzela inhlonipho entsheni. Isahluko sesithathu siveza indima elinywa uMnyango Wemfundo ukugqugquzela isiko lokuhlonipha nokuziphatha kahle entsheni. Lesi sahluko sicubungula izindlela ezingasetshenziswa othisha ukuzama ukuqondisa izingane eziyizigwegwe ngaphandle kokusebenzisa induku. Lesi sahluko siphinde siveze izindlela ezingasetshenziswa othisha ezikoleni ukuxwayisa intsha ngesifo sengculazi. Isahluko sesine sicubungula iqhaza elibanjwa amasonto ukuzama ukubuyisela isiko lokuhlonipha entsheni. Kuhlaziywe izinkolo ezintathu okuyinkolo yobuNazaretha, inkolo yobu-Islam kanye nenkolo yobuKristu. Lezi zinkolo zontathu yize kukhona lapho zinomehluko khona kodwa zigcizelela inhlonipho entsheni. Isahluko sesihlanu sicubungula iqhaza elibanjwa uMnyango wamaPhoyisa kanye noMnyango wokuhlunyeleliswa kwezimilo ekuvuseleleni isiko lokuhlonipha entsheni eNsundu. Inhlosongqangi yale minyango ukushintsha izimilo entsheni esidlebelekile. Isahluko sesithupha sona siqoqa amaphuzu abalulwe ezahlukweni ezingaphambi kwaso. Lesi sahluko sithi siqoqa sibe sikhomba inyathuko okumele ilandelwe ukuzama ukubuyisela isiko lokuhlonipha nokuziphatha kahle entsheni eNsundu.
Author and committee
dc:creator, dc:contributor.*- Author dc:creator
-
- Mbonambi, Herbert Bonginkosi
- Advisor dc:contributor.advisor
-
- Khumalo, L.Z.M.