Ignimbrítið í Hólafjalli og tengdar myndanir - Rakning myndunarsögu gjóskubergs í Fannardal í Norðfirði

Inn af Norðfirði ganga þrír dalir, talið að norðan er það Fannardalur, Seldalur og Oddsdalur. Við gerð nýrra Norðfjarðarganga komu í ljós gjóskubergsmyndanir sem líktust ignimbríti (e. ignimbrite). Hlíðar Hólafjalls í Fannardal geyma slíkar gjóskubergsmyndanir grænleitar að lit og þær eru viðfangsefni þessarar rannsóknar. Markmið rannsóknarinnar er helst að rekja myndunarsögu berglaganna. Myndununum var skipt upp í þrjú snið: lag 1, lag 2 og lag 3. Lag 2 liggur ofan á lagi 1 en um 4 m hraunlag er að milli laga 2 og 3. Bæði efri og neðri lagmót lags 3 fundust auðveldlega, sem og neðri lagmót lags 1 og efri lagmót lags 2 en engin fundust þar á milli og þeim var þá lýst sem einni heild. Grunnmassa laganna var lýst með tilliti til litar og grófleika á hverjum stað sem breytinga gætti. Mæld var lengd og hæð stærstu bergbrota og vikurmola og dreifing þeirra skráð. Lag 1 inniheldur bergbrot í hnullungastærð og lag 2 er ríkt af vikri sem er greinilega öfugt lóðgreindur. Í lagi 3 eru bæði bergbrot og vikurkorn öfugt lóðgreind og hafa minni dreifingu en í lagi 2. Helstu niðurstöður eru að gjóskubergslögin eru 10-12 milljón ára gömul og eiga uppruna sinn líklegast að rekja til Reyðarfjarðareldstöðvar. Talið er með talsverðri vissu að lag 1 sé lag-breksía og sé neðsti hluti lags 2 sem er ignimbrít. Talið er svo að lag 3 sé hluti af lahar-myndun.

Author dc:creator

• Iðunn Kara Valdimarsdóttir 1993-

Contributors dc:contributor

• Háskóli Íslands

• Jarðfræði
• Bergfræði
• Rannsóknir
• Norðfjörður

Language dc:language.iso

is

Handle dc:identifier.uri

http://hdl.handle.net/1946/28195

OAI identifier oai:identifier

oai:skemman.is:1946/28195