Ljósmæðrastýrðar einingar utan sjúkrahúsa: Ávinningur fyrir barnshafandi konur og heilbrigðiskerfið

Í byrjun 20. aldar fóru fæðingar að flytjast inn á sjúkrahús með tilheyrandi sjúkdómsvæðingu og auknum inngripum í fæðingarferlið. Hefur tíðni ýmissa inngripa haldið áfram að hækka á undanförnum áratugum. Ein leið sem farin hefur verið til þess að sporna við þessari þróun er opnun ljósmæðra¬stýrðra eininga utan sjúkrahúsa, þar sem hugmyndafræði ljósmóðurfræðinnar er ráðandi. Ráðlagt er samkvæmt klínískum leiðbeiningum NICE í Bretlandi að hraustar konur í lítilli hættu á vandamálum í fæðingu, fæði á slíkum einingum. Notast var við fræðilega samantekt til þess að leita svara við því hvað þjónusta ljósmæðrastýrðra eininga utan sjúkrahúsa felur í sér, hvaða ávinning þær hafa fyrir barnshafandi konur og heilbrigðis¬kerfið, hver staða barneignarþjónustu á Íslandi er og hvort grundvöllur sé fyrir opnun slíkra eininga hér á landi. Heimildaleit fór fram á viðurkenndum gagnasöfnum, auk þess sem tölulegar upplýsingar voru fengnar af vefsíðum stofnana. Á ljósmæðrastýrðum einingum utan sjúkrahúsa er veitt samfelld ljósmæðraþjónusta í gegnum allt barneignarferlið frá ljósmóður sem konan og fjölskylda hennar þekkir og treystir. Hugmyndafræði ljós¬móður¬fræðinnar er ríkjandi, sem felur meðal annars í sér að barneignarferlið sé lífeðlislegt ferli en ekki sjúkdómur. Rannsóknir hafa sýnt fram á betri fæðingarreynslu kvenna sem fæða á slíkum einingum, jafngóða útkomu fæðingar fyrir barn en minni líkur á inngripum í fæðingu, samanborið við konur sem fæða á fæðingardeildum hátæknisjúkrahúsa. Sýnt hefur verið fram á lægri meðalkostnað fæðinga hraustra kvenna á umræddum einingum samanborið við á hátæknisjúkrahúsum auk fjárhagslegs ávinnings af því að fjölga eðlilegum fæðingum og koma í veg fyrir heilsuleysi móður. Á Íslandi er framboð slíkra eininga verulega takmarkað og samfelld ljósmæðraþjónusta sjaldséð. Jafnframt er aðgengi og val kvenna á barneignar¬þjónustu takmarkað og háð búsetu. Með hliðsjón að þessu má halda því fram að sterkur grundvöllur sé fyrir opnun ljósmæðrastýrðra eininga utan sjúkrahúsa hér á landi. Ásamt því að val kvenna og aðgengi að barneignarþjónustu ykist gæti framboð þeirra aukið tíðni jákvæðrar fæðingarreynslu og eðlilegra fæðinga með tilheyrandi ávinningi fyrir konur, fjölskyldur þeirra og heilbrigðiskerfið. Lykilorð: fæðingarheimili, ljósmæðrastýrð þjónusta, samfelld ljósmæðraþjónusta, hagkvæmni.

Author dc:creator

• Hafdís Guðnadóttir 1990-

Contributors dc:contributor

• Háskóli Íslands

• Ljósmóðurfræði
• Fæðingarþjónusta

Language dc:language.iso

is

Handle dc:identifier.uri

http://hdl.handle.net/1946/24752

OAI identifier oai:identifier

oai:skemman.is:1946/24752