COLLAB á þýska orkudrykkjamarkaðinum : markaðssetning íslensks orkudrykks á erlendum markaði

Neysla á orkudrykkjum hefur farið vaxandi á heimsvísu undanfarin ár og hefur sú þróun ekki farið fram hjá Íslandi. Orkudrykkjamarkaðurinn er sífellt að breytast með tilkomu nýrra vörumerkja sem aðskilja sig frá hefðbundnum orkudrykkjum, meðal annars með heilsutengdum innihaldsefnum. Eitt þeirra vörumerkja er COLLAB, íslenskur orkudrykkur framleiddur í samstarfi Ölgerðarinnar Egils Skallagrímssonar og FEEL Iceland, og einkennist af kollageni unnið úr íslensku fiskroði ásamt náttúrulegu koffíni. Varan hefur náð miklum vinsældum hérlendis og er nú talið stærsta drykkjavörumerki í koffíndrykkjaflokki á Íslandi. Í kjölfar velgengni þeirra á heimamarkaði hefur Ölgerðin ákveðið að fara með COLLAB á erlenda markaði, þar á meðal Þýskalands, sem er einn stærsti orkudrykkjamarkaður Evrópu. Ritgerð þessi fjallar því um markaðssetningu COLLAB orkudrykkjarins á erlendum mörkuðum með áherslu á þýska markaðinn. Þýski markaðurinn einkennist af harðri samkeppni og ríkjandi vörumerkjum, s.s. Red Bull og Monster. Þetta skapar bæði tækifæri og áskoranir fyrir nýtt íslenskt vörumerki sem er enn í uppbyggingu erlendis. Rannsóknarspurning ritgerðarinnar er hvort þýski markaðurinn sé hagstæður fyrir COLLAB. Til að svara henni var beitt blönduðum rannsóknaraðferðum. Annars vegar var framkvæmd spurningakönnun meðal 103 þátttakenda, aðallega þýskra neytenda. Hins vegar voru tekin hálfopin viðtöl við vörumerkjastjóra COLLAB á Íslandi og sérfræðing á framleiðslu- og tæknisviði Ölgerðarinnar. Niðurstöður könnunarinnar leiða í ljós að þýskir neytendur eru almennt jákvæðir gagnvart heilsutengdri staðfærslu orkudrykkja og að bragð og verð vega þyngst við þá kaupákvörðun. Þekking á kollageni er misjöfn en ákveðinn áhugi er til staðar fyrir slíkum vörum. Í viðtölunum er því lýst að þeirra helsta áskorun á þýska markaðinum er að kynna vöruna og að auka vörumerkjavitund. Niðurstöður þessar gefa því til kynna að vaxtarmöguleikar séu til staðar á þýska markaðnum, en að árangur muni aðeins ákvarðast af markvissri markaðssetningu og uppbyggingu vörumerkjavitundar til langtíma.

Authors dc:creator

• Magnús Pedersen Kjartansson 2004-
• Erla María Magnúsdóttir 2004-

Contributors dc:contributor

• Háskólinn í Reykjavík

• Viðskiptafræði
• Orkudrykkir
• Markaðssetning
• Þýskaland

Language dc:language.iso

is

Handle dc:identifier.uri

https://hdl.handle.net/1946/53691

OAI identifier oai:identifier

oai:skemman.is:1946/53691