Hverjar eru helstu takmarkanir á nýju raforkuframboði og hver geta áhrifin verið á hagvöxt og nýsköpun?

Viðfangsefni þessarar ritgerðar er að kanna hverjar helstu áskoranir aukins raforkuframboðs eru á Íslandi og hver áhrifin geta verið á hagvöxt. Greiningin byggir á fyrirliggjandi gögnum, opinberum skýrslum og viðtölum við sjö sérfræðinga úr orkugeiranum, stjórnsýslu og umhverfisvernd. Fjallað er um raforkukerfið á Íslandi, helstu framleiðendur, orkumarkaðinn og spár um framboð og eftirspurn þegar litið er fram veginn. Sérstök áhersla er lögð á hvernig leyfisveitingaferli og óviðunandi ástand raforkuflutningskerfisins seinkar uppbyggingu og dregur úr nýtingarmöguleikum. Viðmælendur voru flestir sammála um að núverandi framboð af raforku dugi ekki til að mæta aukinni eftirspurn til framtíðar og að ástandið skapi raunverulegar hindranir fyrir atvinnuuppbyggingu, nýsköpun og hagvöxt. Þar með er skortur á raforku orðinn efnahagsmál. Viðmælendur voru flestir einnig sammála um að bæta þurfi flutnings- og dreifikerfi landsins og hraða leyfisveitingaferlinu. Einnig kemur fram mismunandi sýn á hvernig og hvort eigi að forgangsraða raforku til atvinnugeira. Niðurstöður ritgerðarinnar eru þær að framboð raforku er lykilforsenda fyrir áframhaldandi og sjálfbæran hagvöxt. Takmarkað framboð hamlar nýjum fjárfestingum en aukið og vel skipulagt framboð styður við sjálfbæran vöxt. Lausnin felst í markvissri og samfélagslega samþykktri uppbyggingu raforkuframleiðslu og flutningi á raforku ásamt skýrri stefnumörkun um nýtingu orkulinda þjóðarinnar. Raforkumál landsins eru því ekki aðeins tæknilegt viðfangsefni heldur lykilatriði í hagstjórn framtíðar. Lykilorð: framboð raforku, eftirspurn raforku, hagvöxtur, nýsköpun, leyfisveitingaferli, flutningskerfi.

Authors dc:creator

• Ólafur Ísar Halldórsson 2003-
• Þórður Jónatansson 2000-

Contributors dc:contributor

• Háskólinn í Reykjavík

• Viðskiptafræði
• Raforka
• Hagvöxtur

Language dc:language.iso

is

Handle dc:identifier.uri

https://hdl.handle.net/1946/50710

OAI identifier oai:identifier

oai:skemman.is:1946/50710