Ólögmæt dreifing tónlistar á Internetinu

Viðfangsefni ritgerðarinnar er að varpa ljósi á óheimila dreifingu tónlistar á Internetinu sem nýtur höfundaverndar, með áherslu á hvaða úrræði standa rétthöfum til boða. Hefur höfundaréttur tekið stakkaskiptum við tilkomu stafræns umhverfis og alþjóðlegra netkerfa. Útbreidd notkun netsins, auk tækniþróunar hefur leitt til þess að hugverki sérhvers manns er mögulegt að dreifa án endurgjalds, jafnvel gegn vilja rétthafa. Hafa slík höfundaréttarbrot reynst bæði markviss og útbreidd og eru þau ein mesta hindrun þróunar tónlistariðnaðarins. Í öðrum kafla verða rakin hvaða réttindi íslensku höfundalögin veita rétthöfum, hverjar þær takmarkanir eru hvað varðar Internetið og hvaða réttarúrræði standa rétthöfum til boða. Í þriðja kafla verður skoðuð ábyrgð einstaklinga á ólögmætri dreifingu tónlistar auk þess sem rakin verður þróun jafningjaneta (e. peer-to-peer) og skoðað hvernig ábyrgð forsvarsmanna þeirra á höfundarréttarbrotum notenda þeirra hefur verið háttað á alþjóðlegum grundvelli. Hefur dómaframkvæmd sýnt fram á að mögulegt er að fella ábyrgð á einstaklinga sem og forsvarsmenn jafningjaneta. Í fjórða kafla er rýnt í mögulega ábyrgð þjónustuveitanda á höfundarréttarbrotum sem framkvæmd eru á netkerfum þeirra. Komist var að þeirri niðurstöðu að ekki verður felld ábyrgð á þjónustuveitendur á sama hátt og forsvarsmenn jafningjaneta. Þó hafa stjórnvöld víða um heim innleitt lög sem skylda þjónustuveitendur til þátttöku í baráttunni gegn ólöglegu niðurhali með góðum árangri. Í fimmta kafla eru lagðar til úrbætur fyrir íslenskt lagaumhverfi til að bregðast við þeirri tækniþróun sem hefur átt sér stað, auk þess sem bent er á hagkvæm viðskiptalíkön sem víða um heim eru að ryðja ólöglegu niðurhali úr vegi. Komist var að þeirri niðurstöðu að þrátt fyrir að nýsköpun og viðskiptahæfileikar vegi þungt í baráttunni gegn ólöglegri dreifingu tónlistar er jafnframt nauðsynlegt að endurskoða íslensku höfundalögin sem og að eyða kröftum í að virkja þjónustuveitendur í baráttunni gegn ólöglegri dreifingu.

Author dc:creator

• Sonja Gunnarsdóttir 1986-

Contributors dc:contributor

• Háskólinn í Reykjavík

• Höfundarréttur
• Netið
• Lögfræði
• Meistaraprófsritgerðir

Language dc:language.iso

is

Handle dc:identifier.uri

http://hdl.handle.net/1946/9287

OAI identifier oai:identifier

oai:skemman.is:1946/9287