Geta skuggastjórnendur borið ábyrgð samkvæmt íslenskum rétti?

Ritgerðin fjallar um ábyrgð stjórnenda hlutafélaga og mögulega ábyrgð skuggastjórnenda samkvæmt íslenskum rétti. Í fyrri hlutanum er fjallað um stjórnun hlutafélaga og almenn sjónarmið um stjórnun þeirra. Gerð er grein fyrir skyldum kjörinna stjórnarmanna, framkvæmdastjóra og hluthafa hlutafélaga. Skoðuð eru skilyrði fyrir skaðabótaábyrgð vegna vanrækslu á skyldum og ákvörðunum til að hafa uppi skaðabótakröfu. Hinum almennu skaðabótareglum eru stuttlega gerð skil, auk sjónarmiða um sönnunarbyrði. Í seinni hlutanum er fjallað um skilgreiningu og sérkenni á hugtakinu skuggastjórnendur. Leitast er við að skoðað aðstæður, hegðun og skilyrði sem þurfa að vera til staðar til að aðili geti fallið undir hugtakið. Gerð er grein fyrir hugsanlegum skuggastjórnendum og tilvist þeirra. Samanburður er gerður á breskum, dönskum og íslenskum lögum varðandi skilgreiningu og túlkun á hugtakinu skuggastjórnandi. Í ritgerðinni er aðallega stuðst við fræðibækur og greinar á sviði félagaréttar. Einnig er stuðst við innlend og erlend hlutafélagalög og dómafordæmi. Markmið ritgerðarinnar er að gera grein fyrir hugtakinu skuggastjórnandi og svara þeirri spurningu hvort skuggastjórnandi geti borið ábyrgð samkvæmt íslenskum rétti. Til að nálgast svarið er nauðsynlegt að skoða skyldur og ábyrgð stjórnenda, í því skyni að kortleggja við hvaða aðstæður stjórnendur geti borið skaðabótaábyrgð. Einnig eru skilgreindar aðstæður og skilyrði sem þurfa að vera uppfyllt til að aðili falli undir hugtakið skuggastjórnandi. Helstu niðurstöður eru að skuggastjórnendur geta borið ábyrgð samkvæmt íslenskum rétti. Þrátt fyrir að dómafordæmi séu fá þá hafa dómstólar dregið þá til ábyrgðar sem taldir hafa verið hinir raunverulegu stjórnendur. Bótaábyrgð samkvæmt almennum skaðabótareglum leiðir til sömu niðurstöðu og samkvæmt skaðabótaákvæðum hlutafélagalaganna.

Author dc:creator

• Ólafur G. Magnússon 1960-

Contributors dc:contributor

• Háskólinn í Reykjavík

• Hlutafélagaréttur
• Skaðabótaréttur
• Lögfræði

Language dc:language.iso

is

Handle dc:identifier.uri

http://hdl.handle.net/1946/6985

OAI identifier oai:identifier

oai:skemman.is:1946/6985