Bálkakeðjutæknin & stjórnarhættir fyrirtækja : er tækifæri til að styrkja hlutverk hluthafafunda og auka þátttöku hluthafa með bálkakeðjutækninni?

Í þessari ritgerð er fjallað um möguleika á notkun bálkakeðjutækninnar við framkvæmd rafrænna hluthafafunda í skráðum félögum. Varpað er ljósi á atriði sem geta verið talin koma í veg fyrir að hluthafafundur uppfylli að fullu hlutverkið sem honum er ætlað að gegna samkvæmt hlutafélagalögum. Farið er yfir framkvæmd hluthafafunda og metið hvort breytinga sé þörf við framkvæmd þeirra með tilliti til krafna um aukin hraða í ákvarðanatöku, öra tækniþróun og hvernig hægt sé að efla vettvang hluthafafunda og auka þátttöku hluthafa. Bálkakeðja er sameiginleg dreifð færsluskrá sem starfrækt er á jafningjaneti þar sem hver og einn þátttakandi geymir eintak af færsluskránni og uppfærir hana ef samhljóða álit næst á meðal þátttakenda. Einkenni bálkakeðjutækninnar sem stuðlar að auknu gagnsæi og öryggi getur komið að gagni við framkvæmd rafrænna hluthafafunda. Lokuð bálkakeðja gæti hentað starfsemi félaga því að hún byggist á því að þátttaka í bálkakeðjunni er háð samþykki. Snjallsamningar gera það kleift að hægt er að byggja upp bálkakeðjuna samkvæmt þörfum hvers hlutafélags. Varpað er ljósi á álitaefni tengd takmörkunum tækninnar og áskorunum við að uppfylla kröfur persónuverndarlaga og heimfæra þær á þetta nýja tækniumhverfi. Lagðar eru fram tillögur að ferli rafrænna hluthafafunda samkvæmt íslenskum lögum sem yrðu framkvæmdir með bálkakeðjutækninni og varpað ljósi á lögfræðileg álitaefni. Notkun bálkakeðjutækninnar getur rúmast innan núgildandi hlutafélagalaga, að því gefnu að ákvæði laganna séu uppfyllt með notkun hennar og tryggt sé að hluthafar hafi möguleika á að nýta sér þann rétt sem þeim er tryggður í hlutafélagalögum. Niðurstaða höfundar er sú að bálkakeðjutæknin geti komið að gagni þegar framkvæmd hluthafafundar er annars vegar. Hins vegar verður að telja miðað við núverandi takmarkanir tækninnar og í ljósi þeirrar lagalegu óvissu sem ríkir megi telja að það sé ekki skynsamlegt þessa stundina að nýta bálkakeðjutæknina til að framkvæma rafræna hluthafafundi að öllu leyti.

Author dc:creator

• Erna Sigurðardóttir 1992-

Contributors dc:contributor

• Háskólinn í Reykjavík

• Lögfræði
• Meistaraprófsritgerðir
• Félagaréttur
• Stjórnunarhættir

Language dc:language.iso

is

Handle dc:identifier.uri

http://hdl.handle.net/1946/32174

OAI identifier oai:identifier

oai:skemman.is:1946/32174