Umhverfi, nærveður og athafnir á almenningssvæðum

Almenningssvæði borga og bæja hafa í gegnum tíðina verið samkomustaður íbúanna, þar sem fólk hittist, skiptist á fréttum og mætir á viðburði. Þar skipta gæði umhverfis og nærveður miklu máli í því að fá fólk til þess að dvelja úti. Sagt er að góð almenningssvæði séu m.a. með áhugavert útsýni, setumöguleika, í mannlegum skala, með gott aðgengi og þar sé afþreying fyrir fólk. Þeir veðurfarslegu þættir, sem taldir eru hafa áhrif á þægindi fólks, eru m.a. staðbundinn vindhraði, hiti, sólskin og úrkoma. Þá hafa margir tilhneigingu til að líta á svalt loftslag sem takmörkun frekar en möguleika. Byggingar og gróður geta haft áhrif á staðbundið veðurfar og með hönnun er hægt að bæta það nærveður sem skapast á svæðunum. Meginmarkmið þessa verkefnis er að auka þekkingu á notkun torga í þéttbýli hér á landi með því að kanna hvernig umhverfi og nærveður hafa áhrif á notkun svæða og athafnir fólks. Valin voru tvö svæði, í tveimur bæjum með svipaðan íbúafjölda. Rannsóknin fór fram fimm daga á hvoru svæði og voru dagar valdir með fjölbreytni í veðurfari. Framkvæmd athugunar var upptökubrot á rannsóknarsvæðunum milli klukkan 10:00 og 19:00 með ákveðnu millibili til þess að safna saman upplýsingum um atferli fólks. Athafnir voru flokkaðar eftir líkamsstöðu (liggja, sitja, standa og ganga) og eftir auðsýnilegri afþreyingu (borða, horfa, tala/hlusta, lesa og annað). Eins voru gerðar greiningar á miðbæjunum (afþreying, staðsetning setusvæði, göngumöguleikar og framhliðar húsa) og skrásett hvaða svæði innan rannsóknarsvæðisins væru mest notuð. Þá var safnað saman upplýsingum um veðurfar (hita, vindhraða og skýjafar). Niðurstöður þessa verkefnis benda til þess að séreinkenni svæðanna og hlutverk þeirra í stærra samhengi hafi áhrif á fólk. Veðurfarslegir þættir þurfa að vera innan ákveðinna marka, þá dvelur fólk á svæðunum. Svæðið á Egilsstöðum var mest notað til þess að setjast niður og fá sér eitthvað að borða og síðan að spjalla við samferðafólk sitt. Svæðið á Húsavík var mest notað til þess að njóta útsýnisins og þá stóð fólk mikið við steinvegginn. Mikið var um félagslegar athafnir á báðum svæðunum. Hitastigið hafði áhrif á fjölda fólks á báðum svæðunum, þó lítil í flestum tilvikum. Vindhraðinn hafði töluverð áhrif á fjölda fólks á svæðinu á Egilsstöðum en ekki var marktækur munur á svæðinu á Húsavík. Eflaust hefðu veðurfarslegu þættirnir komið sterkar fram hefði verið breiðara svið hita og vindhraða.

Author dc:creator

• Anna Katrín Svavarsdóttir 1985-

Contributors dc:contributor

• Landbúnaðarháskóli Íslands

• Umhverfismál
• Atferli
• Skemmtanir
• Egilsstaðir
• Húsavík

Language dc:language.iso

is

Handle dc:identifier.uri

http://hdl.handle.net/1946/15410

OAI identifier oai:identifier

oai:skemman.is:1946/15410